› 選擇地區
三藩市
紐約
洛杉磯
其他美國地區
香港 台灣 北美
 
2014年12月24日

2014體壇回顧:
Road To Change

【2014回顧(國際體壇篇)】「每當變幻時,便知時光去」,2014年嘅國際體壇係充滿變幻、改朝換代嘅一年。NBA嘅熱火、F1嘅紅牛均王位不保,最遺憾係女網球手李娜,年初喺澳洲贏個人第2個大滿貫冠軍,到9月因傷退休;先後爆出禁藥醜聞嘅羽毛球手李宗偉同泳手孫楊,同樣歷盡風波。
文:牽牛、紅烽

相關新聞:體壇靚二代

NBA篇:大帝被「刺」傷返娘家

目標成為繼湖人王朝00至02年後,另一支NBA3連冠球隊,熱火喺2014年總決賽始終功虧一簣;熱火維持3巨頭勒邦占士、獲迪、保殊基本陣容,但畢竟獲迪傷患纏身,內線防守力亦弱,喺13/14球季常規賽只取54勝28負,僅以東岸次名出線。喺季後賽東岸晉級過程亦未見霸氣,東岸決賽淘汰溜馬,最主要因為對手將帥不和而「自爆」。
謀求球會第5次總冠軍嘅馬刺,就繼續默默起革命,除咗3老鄧肯、柏加同真路比利,仲喜見前鋒尼納特冒起。常規賽取得62勝聯盟最佳成績,晉級過程淘汰小馬、拓荒者同雷霆,更具說服力,總決賽以4:1擊敗熱火,兩場作客比賽都贏波,叫邁阿密球迷收口。

騎士新3巨頭雷聲大

今年NBA兩個大獎都由新面孔奪得,雷霆前鋒杜蘭特以25歲之齡,首嘗常規賽MVP;總決賽MVP仲後生,馬刺前鋒尼納特憑全能表現獲獎,佢更加以22歲351日壓過隊友鄧肯,成為史上第3年輕嘅總決賽MVP。勒邦占士喺10年加盟熱火記者會上豪言,幫球隊拎3、4、5個總冠軍,贏到兩次之後,14年飲恨,今夏更決定踏上回家之路;「大帝」重返克里夫蘭騎士,成為今季NBA最矚目轉會,連鎖反應係騎士簽入木狼前鋒路夫,同原有嘅K艾榮組成新3巨頭;不過默契未建立,新騎士開季戰績一般。
除咗勒邦占士轉會,其他較矚目嘅轉會仲有柏臣斯加盟小馬,丹治轉投熱火,湖人羅致「甜瓜」安東尼不成,只引入林書豪、保沙等次貨,繼續由傷癒嘅拜恩苦苦支撐,開季頭10戰只得1勝9負。或者喺呢個月14日湖人作客木狼,拜恩獨取26分,成功超越米高佐敦升上聯盟得分榜第3位,已算係對紫金兵團球迷有些少安慰。
至於NBA加州最強勢力,已落喺勇士身上,由新帥卡爾領軍,「浪花兄弟」史堤芬居里同K湯遜百步穿楊,一度打出16連勝。

F1篇:新車神捧蛋玩跳槽

F1今季變動唔少,當中最令觀眾唔習慣嘅,應該係27歲「新車神」維特爾竟然衰足全季。喺開季前,一早都知紅牛新戰車唔掂,大家都冇預維特爾可以衞冕,實現5連霸;但勢估唔到,呢位4屆總冠軍,今季連一個分站冠軍都未贏過,全季嘅成績仲差過新嚟嘅隊友歷斯亞度,認真失威。
去到季尾,意興闌珊嘅維特爾就話想轉換吓環境,嘗試新挑戰,於是宣佈離開由11歲起效力嘅紅牛,轉投更加霉嘅法拉利,孖住老友冰人拉高倫出戰。維特爾嘅加盟,變相踢走艾朗素,促成佢回歸麥拿侖,同畢頓合作爭冠。又多一隊湊成兩位前世界冠軍嘅黃金組合,對車迷嚟講梗係好事。
平治今年以無敵姿態包辦車手冠、亞軍,兼且提早3周篤定車隊總冠軍,都叫拍得住呢幾年嘅紅牛咁威風。不過,咸姆頓今季封王嘅過程中,同隊友羅斯保由頭鬥到尾,仲搞到公開反晒面,唔知大家仲可唔可以合作。

網球篇:李娜周身傷決勇退

中國網球1姐李娜年頭有個好開始,首次贏到澳網,亦係佢個人第2個大滿貫冠軍,點知數字只能夠停留喺度。娜組喺年中嘅法網同溫網都早早出局,例牌又俾強國傳媒加網民鬧爆,之後仲同教練卡洛斯結束合作關係,再因為傷患而退出美網。喺呢段期間,唔少人都估32歲嘅佢職業生涯已經到尾聲,終於到咗9月中就喺微博宣佈掛拍,做個幸福師奶。女單強敵娜姐已退,細威莎蓮娜年尾就越戰越勇,連贏美網同年終賽兩個大賽冠軍。
至於瑞士天王費達拿就連食兩年白果,先喺4大滿貫輸晒,去到年終賽幾經辛苦入到決賽,點知傳聞因為老婆米爾嘉得罪咗老友華域加,所以佢喺開波前宣佈退出。不過呢對老死之後出戰台維斯盃,就合力幫瑞士贏波捧盃,攞番個尾彩。

羽毛球篇:悲情1哥衰運纏身

當今最受歡迎嘅羽毛球手可能係林丹,但今年新聞最多、最轟動嘅,就一定係悲情1哥李宗偉。呢位大馬拿督喺今年嘅哥本哈根世錦賽成功殺入決賽,對手仲要難得唔係宿敵林丹,而係林丹嘅小師弟諶龍,可惜都係破唔到二奶命。1個月後去到仁川打亞運,佢提早喺4強遇上林丹,結果又係輸波出局,到𠵱家都仲未喺大賽贏過金牌。
好事從未發生,但衰嘢就接住嚟。李宗偉之後爆出禁藥醜聞,俾人驗到參加世錦賽期間食過禁藥,之後覆檢埋B樣本都係「肥佬」,上訴又仲未開審,佢目前就要無限期停賽;但證據確鑿,睇怕嗰兩年停賽令都係走唔甩,2016里約奧運凍過水。

游泳篇:麻煩友孫楊多是非

孫楊上年因無牌駕駛而坐監,之後俾國家流放返杭州閉門思過,到咗今年5月全國錦標賽復出即攞金牌。可惜喺9月亞運第一戰,就俾日本嘅「新費斯」萩野公介爆冷贏咗金牌。孫楊賽後仲唔忿氣,話日本國歌難聽,引起軒然大波,而佢最終都攞到3金1銀,對中國隊橫掃亞運151金108銀83銅有貢獻嘅。好衰唔衰,到11月爆出原來佢喺全國錦標賽嗰陣服用禁藥,不過得到國家體育局包庇,喺冇大賽舉行嘅5月至8月中服刑,低調停賽完3個月,所以「咁啱」趕得切喺亞運前浮番上水參加比賽。

曾經稱霸全世界嘅29歲美國飛魚費斯,都係咁唔潔身自愛。退休兩年肥咗成40磅嘅費斯,復出後成績都唔錯,點知9月又因為醉駕被捕,俾美國泳聯罰停賽半年,下年世錦賽都冇得玩。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載