› 選擇地區
三藩市
紐約
洛杉磯
其他美國地區
香港 台灣 北美
 
2014年12月24日

求驗客手記:巴神、禾琪
年度twitter王后

「正常人夠我富議論性麼,你叫我做浮誇吧!加幾聲噓聲也不怕!」每次講起巴洛迪利,我求大俠都會諗起陳奕迅首《浮誇》,但巴神嗰種同《浮誇》有少少唔同,歌入面嘅主角係為出位而浮誇,但巴神層次更高,係真心浮誇而出位。巴神嘅浮誇唔單止得到注意咁簡單,仲做埋大娛樂家,成為今年度嘅twitter之王!

巴神要英女皇錫啖最爆

英國《每日郵報》選出巴洛迪利做今年嘅twitter之王,因為巴神啲言論真係夠晒爆,又夠晒話題。其中喺今夏世盃,意大利同英格蘭同組,當英軍兩連敗之後,意大利必須喺第2輪贏到哥斯達黎加,英格蘭先有出線希望。比賽前,巴神喺twitter度口出狂言,話如果佢哋贏到哥斯達黎加的話,就要英女皇咀佢一啖!

禾琪戀情好睇過師奶劇

呢番話有成17萬人轉載,近9萬人讚好!點知意大利最後輸咗,結果巴神被網民恥笑。近排巴神受傷,上陣少咗,人氣都弱咗,但佢自己仍然識搞出意外,上載咗張Super Mario嘅相,但上面嘅字眼涉及歧視猶大人,引起軒然大波,最後巴神道歉之外仲被罰停賽。從另一個角度睇,巴神唔使點花苦心就做到突出一個,相信球壇都冇邊個夠佢富議論性!喺浮誇方面,佢真係一位天才。
至於體壇嘅twitter之后就係嚟自網球壇嘅「丹麥甜心」禾絲妮雅琪。禾琪上榜同佢個靚樣或者有少少關係,但最大嘅原因都係佢同高球手麥艾萊嘅戀情。如果睇巴神twitter好似睇緊無厘頭嘅笑片的話,禾琪嗰套就似三色台啲師奶劇。今年頭,禾琪同麥艾萊訂婚,佢仲將戒指相擺埋上網,不知幾咁甜蜜,但半年都未夠,佢兩個就散咗。分手後,禾琪仲度咗句靚台詞,喺網上同支持者講:「呢個係我人生中艱難嘅時刻,多謝大家留言。好開心,我𠵱家全力支持利物浦,因為我知道永遠不會一個人獨行。」咁就過萬轉載同過萬like。我求大俠希望嚟緊一年,巴神同禾琪除咗喺球場外搶鏡,球場內都有好表現啦!

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載