› 選擇地區
三藩市
紐約
洛杉磯
其他美國地區
香港 台灣 北美
 
2015年01月09日

咖喱牛腩:打好根基靠青訓 - 咖喱

國足由以前係亞洲一線,到𠵱家變成亞洲二線,俾日、韓放甩成條街,衰落原因都係老生常談,就係青訓問題。就算有錢,但喺急功近利嘅大環境下,錢都用晒喺治標唔治本嘅地方。
內地網民成日將國足同英格蘭比,直情叫英格蘭做「歐洲天朝」,或者「歐洲中國隊」,因為英格蘭同國足嘅處境係有啲似,例如青黃不接,球員一代差過一代;戰術落後,慢慢俾鄰近地區追過;本地好教頭越嚟越少;本地傳媒吹捧過度等等。
02年帶國足打入世盃決賽周嘅神奇教練米路天奴域(圖)上年講過,足球好似金字塔,成功一定要由基本做起。世青盃係反映中國青訓實力嘅好指標,但自從05年入過16強,之後屆屆都入唔到決賽周;就算喺U19亞洲盃都差唔多,04年做過亞軍,但之後屆屆都唔過8強。
據舊年嘅統計,49間中超、中甲同中乙嘅球會,只有9%喺青訓投入超過1,000萬(人民幣、下同),近7成連400萬都冇。投入青訓嘅錢唔多,導致學費高昂,變相令到好多貧苦小朋友冇得入足球學校,例如恒大一年5萬蚊學費。當係入平少少嘅足球學校,一個家庭平均要使50萬先可以供到個小朋友上U19梯隊。從投資角度,放錢入青訓係風險好大,因為即時睇唔到回報,可能要等三五七年都未必有,但如果要從根本振興一國足球,就非投入資源喺青訓不可。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載