› 選擇地區
三藩市
紐約
洛杉磯
其他美國地區
香港 台灣 北美
 
2015年01月10日

真係勢必跑?
方嘉柏經典一哩「準備」爆

沙田馬場呢日(9日)有兩組1200米泥閘,其中第一組方廐有「勢必跑」、「文藝復興」及「準備就緒」三駒出試,出試前方嘉柏好緊張,好似跑大賽咁,捉住三隻馬嘅騎師紀仁安、何澤堯及杜利萊傾咗好耐,猛咁向佢哋教路,但主要都係同「準備就緒」嘅杜利萊交談,講到興起時,方嘉柏更狂笑,推咗杜利萊兩下,唔知點解開心。
結果呢組泥閘由紀仁安操刀之「勢必跑」勝出,一早已守住前列二三位,直路認真推騎追上,力壓胡廐「紅牡丹」掄元,「文藝復興」跟前亦有推騎考驗下跑第三;「準備就緒」杜利萊就大致按兵不動,只跑第五但姿態反而最輕鬆,呢匹新勝馬狀態肯定冇回落。
試完方嘉柏有走落隧道接馬,但大部份時間只跟住「準備就緒」,向杜利萊問長問短,其他兩駒只睇一兩眼就算。睇番賽程,「勢必跑」及「準備就緒」都已報本月18日經典一哩賽,「勢必跑」雖然身價極高,外地四戰三勝,係法國打吡第五名,但畢竟在港未跑過,賽前亦只展開快跳個半月左右。反而「準備就緒」草地雖未威過,但至今五捷大熟大勇,評99分係經典一哩賽第二高分戰馬,難怪方嘉柏今朝最緊張係佢!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載