› 選擇地區
三藩市
紐約
洛杉磯
其他美國地區
香港 台灣 北美
 
2015年01月16日

咖喱牛腩:噓爆拿斯尼 - 牽牛

每逢曼城對阿仙奴,又係廠迷被瘋狂抽水之時,甚麼飼養球會、衞星球會,幫曼城登基云云,聽到慣晒。其實唔好話我阿Q,從另一方面睇,阿仙奴其實當曼城水魚咁撳,艾迪巴約、拿斯尼(圖)、基捷基治同高路托尼,講真賣出價好高,事實上除咗拿斯尼外,幾位都打唔番兵工廠時期嘅水準,不過最令阿仙奴球迷難以釋懷,卻又係呢個拿斯尼。
首循環阿仙奴主場對曼城,正選嘅基捷基治冇噓聲,冇份踢嘅沙格拿亦都獲尊重,因為廠迷知道咩叫好嚟好去;不過對住拿斯尼就唔同講法,雖然佢二○一一年已經離開,不過作客阿聯酋球場仍然全場受到噓聲。講真,拿斯尼踢阿仙奴三季幾,都入唔少靚波,不過性格就太自我,好嘞,你想走人,你要高薪,咪畀你轉會去曼城囉,冇人叫你一定要感恩,不過你走咗之後又唔好成日數臭舊會囉。
下周日曼城對阿仙奴,拿斯尼又似乎不甘寂寞,大談跳槽往事。拿斯尼就話二○一一年夏天,其實當時曼聯領隊費格遜,特登飛去巴黎斟介佢,原本拿斯尼都心郁郁,不過費Sir就講到,成為紅魔鬼一分子,以後對阿仙奴就要好似打仗咁認真,拿斯尼就話自己好重感情喎,對住舊隊友好難硬心腸,結果拒絕咗曼聯,加盟同阿仙奴冇咁深仇口嘅曼城。
我唔知拿斯尼咁講,可唔可以幫佢洗底,不過阿仙奴今時今日,都叫做有山神、奧斯爾、辛迪卡索拉等黃金中場,都唔會懷念佢,但只要佢一拎波,廠迷都係照噓佢囉。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載