› 選擇地區
三藩市
紐約
洛杉磯
其他美國地區
香港 台灣 北美
 
2015年01月16日

體壇拾趣:小丁失「利」網民鬧爆

小丁苦戰下打到托晒頭,最終都係連續四年喺大師賽首圈畢業。
新華社

做過世界第一、拎過五個冠軍,舊年威到震嘅中國桌球一哥丁俊暉,嚟到二○一五年似乎唔多順利喎!佢喺周三晚出戰倫敦舉行嘅桌球大師賽,爆冷以3:6輸畀東道主球手佩利,連續四年首圈出局;賽後仲俾網民柴台,睇見都戥佢心酸。

火箭再破百暫領先傅家俊

世界排名第二嘅小丁周三喺桌球大師賽首圈亮相,對戰英格蘭老將佩利,雙方之前對賽十六次,小丁贏過十三次,點睇都高一線啦!點知小丁第一節已經落後1:3,休息過後一度追近局數2:3,但之後失誤極多,相反佩利全場三次打出一桿過百,以6:3爆冷贏波,四十歲人終於首次殺入賽事八強。呢位球手周五將會對戰北愛爾蘭嘅艾倫,後者喺首圈以6:4淘汰前世界冠軍希堅斯。
小丁二○一一年曾經喺呢項賽事奪冠,但之後四年都首圈出局。賽後佢話:「或者亞歷山大宮(賽場)唔鍾意我。或者我應該諗番初嚟英國嘅生活,嗰時每場比賽都渴望贏,𠵱家缺少咗戰鬥精神。」
其實小丁今個賽季狀態持續低迷。今次仲有網民喺佢微博留言狂踩,有球迷話「丁俊暉時代結束了」,更加有人鬧佢「以為撿了個世界第一,你就真以為自己是世界第一」。
至於「火箭」奧蘇利雲周四於八強迎戰香港一哥傅家俊,於第一局打出一桿一百零一度,以七百七十六次破百打破亨特利的紀錄,截稿前領先3:1。(now637台今日9:00pm直播)

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載