› 選擇地區
三藩市
紐約
洛杉磯
其他美國地區
香港 台灣 北美
 
2015年01月19日

求驗客手記:奇招挫昆軍
百變魔君玩嘢?

各位稱呼雲高爾為戰術大師,我求大俠就覺得應該叫佢「百變魔君」先貼切,自從佢嚟到曼聯後,無論排陣用人,場場比賽都有新花款。上周六英超作客昆士柏流浪(QPR),搵菲爾鍾斯開角球、踢踢吓3-5-2又轉4-4-2、棄用法卡奧一場後又畀佢踢足全場,總之就估佢唔到,真係要學家英哥大嗌一聲:「好難捉摸呀!」

球迷話變陣就轉

紅魔上周六靠兩名後備兵費蘭尼同占士威爾遜各入一球,以2:0贏QPR;淨係聽話後備兵,都知下半場先入到波。咁上半場踢成點呢?真係唔多掂,攻勢仲少過對手,當中睇到球迷O晒嘴嘅,就係中堅菲爾鍾斯竟然兩次由右路走到左路開角球。唔好話費Sir,莫天才都未試過搵中堅開角球,最慘係唔見有咩效用,其中一次仲要近柱都唔過,嘥體力又嘥心機。
上半場踢得咁差,雲帥下半場即調費蘭尼入嚟,之後踢多十分鐘,換走埋莊尼伊雲斯,調入占士威爾遜踢雙前鋒,個陣由3-5-2轉番4-4-2,果然唔使一分鐘,就由費蘭尼射入。諷刺係,大家都知雲高爾幾咁鍾情3-5-2,即使輿論話唔啱紅魔,佢都唔肯就範,但呢場波聽講喺現場啲魔迷係咁起哄嗌4-4-2嘅口號,我求大俠真係估唔到雲帥聽到球迷叫囂先肯變陣,你話幾咁奇!

鬧完又讚法卡奧

另一怪事就係法卡奧。佢上場對修咸頓連後備都冇,加上雲帥早前又話呢位哥倫比亞前鋒融入唔到隊波,外界都估計佢季尾租借合約一完就走人,但點估到佢呢場踢番正選之餘,仲要踢足九十分鐘,就算入唔到波,雲帥賽後都大讚佢踢得好。你話雲帥個標準一時一樣,仲唔係佢玩晒?
不過無論幾咁估佢唔到,紅魔呢場都三分落袋,佢梗係開心,賽後仲同一位肥仔球迷玩自拍,呢個「好假的肥仔」,同佢個樣仲要生得好鬼似。另外,有傳紅魔準備今夏用一億鎊買皇馬翼鋒加里夫巴利,據聞迪基亞會作為交易嘅一部份,賣門神?我求大俠覺得流料居多。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載