› 選擇地區
三藩市
紐約
洛杉磯
其他美國地區
香港 台灣 北美
 
2015年01月27日

求驗客手記:英足盃晉級奪四連勝
槍手一月狂熱

如果阿仙奴係一隻股票,會有咩特徵?就係一月爆升,出現大陽燭!雖然英足盃第四圈大吹冷風,但三連勝嘅阿仙奴就逆市上升,靠路斯基大師級嘅發揮,作客以3:2贏咗白禮頓,順利晉級。賽後領隊雲格話槍手氣勢如虹,季尾成績實有保證。但據我求大俠多年睇波嘅經驗,阿仙奴呢隻股一月係威係勢(見附表),但每逢二月總係插水,話唔定已經見頂,唔好開心得咁早住。

路斯基神級表現

呢輪英足盃真係輸死人,隊隊名牌都贏唔到,嚟到星期日,終於正路番少少。阿仙奴對英冠白禮頓排咗唔少副選同傷好冇耐嘅球員上陣,踢得唔錯,禾確特兩分鐘就開紀錄。呢場最搶鏡嘅球員係老將路斯基,非常瀟灑,除咗係咁傳no look pass,廿四分鐘仲助攻奧斯爾入波,半場幫兵工救領先兩球。換邊後,雖然白禮頓入番球,但路斯基喺五十九分鐘第一時間起腳抽射,幫阿仙奴拉開至3:1。就算防線大意,尾段又俾對手入多球,但阿仙奴頂得住,贏3:2晉級。
見到其他豪門先後喺英足盃中伏,自己隊波都順利過關,阿仙奴領隊雲格賽後都得意洋洋,「上周六嘅賽果真係令我非常驚訝,我要睇多兩次先信係真,但呢啲就係英足盃嘅魅力。爆冷嘅賽果都令我哋今場更加小心。」

阿仙奴呢場一反爆冷之風,因為佢哋真係好強勢,自從元旦輸完俾修咸頓之後,計埋呢場取得四連勝,之前三場贏波仲冇失波,就連雲格都話氣勢如虹,「我哋嘅氣勢非常好,但要保持警剔,因為表現一跌,氣勢就會冇晒。我哋有機會可以喺季尾攞到好成績,每場比賽都要全力以赴。」

包列斯達唔再係險簽

做阿仙奴球迷,呢排真係人生滿希望,前路雲格創,除咗係咁贏波,仲喺維拉利爾簽到巴西後衞基比爾包列斯達。雲格都話,交易就快落實;呢次唔使再俾人笑險簽。不過我求大俠就覺得要睇定啲,因為阿仙奴唔知係咪得罪咗二月,近年每逢二月,佢哋就係咁輸波,一個月間會由叫幾飛變成四大皆空。喺二月頭,阿仙奴就要作客死敵熱刺,希望呢場唔係槍手見頂滑落嘅比賽啦。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載