› 選擇地區
三藩市
紐約
洛杉磯
其他美國地區
香港 台灣 北美
 
2015年01月29日

韋達騎輸畀雷神!
搞到吳婉芳冇得威

練馬師大摩腸胃炎肚痾,本周二及周三冇落馬場督操,呢晚亦未有入場,不過佢老哥呢晚照樣贏馬,創出連勝六個賽日佳績。
第六場摩廐「活力歡騰」上仗跑谷草1800米三級賽一月盃,大熱倒灶輸頸位僅得第三,今勻睇準谷草有場105分上限二班1800米,此駒本身以104分上陣賺盡形勢,果然順利由雷神補中,獨贏有3.1倍,計落有啲超賠率。「活力歡騰」同時成為今季新一匹三捷馬,谷草1800米累積三戰兩冠一季,在百萬挑戰盃由34分一下子彈上49分,超越賽前以36分並列榜首之「帝聖神駒」同「喜喜寶」,在龍虎榜領先。
「活力歡騰」呢場比預期中冷,全賴由蔡明紹換韋達之東廐馬「喜蓮巨星」由頭熱到尾2.3倍,呢匹吳婉芳丈夫胡家驊的愛駒,沿途守第三位靚位,直路中段一度看似甚具良機,但韋達就係唔夠雷神硬淨,感覺韋達太柔,逼唔出大隻馬「喜蓮巨星」的爆炸力,結果擋唔住「活力歡騰」衝刺,在場的吳婉芳落力高聲嗌馬,還是嗌輸收場,樣子隨即顯得冇晒心機,胡家驊家族今季仲未拉過頭馬,而這場三、四名分別係「魅力星」及「牛精仔」。
「活力歡騰」馬主周祈銳指賽前有一定信心,只忌重磅,好彩馬兒頂得住,他相信愛駒仍有少許進步,期待日後在級際賽有好表現,目標是3月29日田草1800米三級賽精英碟。而對於「活力歡騰」已榮登百萬挑戰盃榜首,周祈銳笑言預咗稍後畀其他馬過頭,因為以「活力歡騰」目前評分,谷草冇乜合適路程再跑。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載