› 選擇地區
三藩市
紐約
洛杉磯
其他美國地區
香港 台灣 北美
 
2015年01月29日

求驗客手記:踩碎謝四溫布萊夢
茅王DC人神共憤

周二英聯盃次回合賽事,車路士返主場再戰利物浦,九十分鐘法定時間入球欠奉,但火藥味就十足。車仔前鋒迪亞高哥斯達(DC)成為新一代英超茅王,今場波兩次踩落對手隻腳度,仲要係想收人山嗰隻。場波法定時間0:0賽和,兩回合計踢成1:1打和,車仔喺加時由伊雲洛域頂入奠勝殺入決賽。

踩人插眼球證冇表示

迪亞高哥斯達今季加盟車路士,入波能力真係冇得頂,但球品就麻麻地,唔少英超球迷都覺得佢有好多小動作同陰招。周二場波哥斯達嘅表現極具爭議性,佢竟然冇領紅牌踢足全場,我求大俠真係覺得幾意外!哥斯達喺十二分鐘同安利簡恩搶波,見對手跌咗喺地下,扮走去執波嗰陣,一腳踩落簡恩腳踭度,之後仲一臉無辜咁嘅樣。到五十七分鐘哥斯達又嚟料,佢同紅軍中堅史卡迪爾鬥法,殺入禁區俾後者快一步踢走個波,哥斯達乘勢繼續向前衝,跳一跳起再踩落史卡迪爾右腳度,睇番慢鏡都幾恐怖。到加時下半場,嗰陣車路士已經由伊雲洛域頭槌建功領先1:0,哥斯達畀俾軍隊長謝拉特搶咗個波兼食埋個位,就喺後面上下其手,又掃眼又拉跌謝四,呢吓雖然唔係收山腳,但仍然好粗野,搞到謝四躁晒,互有推撞下兩個都領黃牌。

摩帥炮轟傳媒玩針對

摩連奴賽後實行惡人先告狀。當地《天空電視》直播嘅評述員亨利同列納都話哥斯達應該拎紅牌,但摩帥就話佢哋玩針對:「《天空電視》以『犯罪』迪亞高哥斯達,令我好意外。一切純屬意外,佢只係衝向個波,咁啱對手攤喺地下箒。班專家坐喺度講波,大把錢收又冇壓力,但講波都要公平,評論要中肯。」
雖然贏波入決賽,但摩連奴仲要頭痕,一來未知英足總會唔會對哥斯達秋後算賬,二來法比加斯喺今仗受傷退下火線,周六英超大戰主場鬥曼城,最壞情況係神射手同助攻王都出唔到。
紅軍喺英聯盃出局,亦粉碎咗謝拉特想臨走前喺溫布萊球場贏番個冠軍嘅一半美夢;惟有喺英足盃再努力啦!

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載