› 選擇地區
三藩市
紐約
洛杉磯
其他美國地區
香港 台灣 北美
 
2015年02月03日

求驗客手記︰前四狂魔殺到嚟
修咸頓輸波有得震

右閘比利連(右)喺星期日幫阿仙奴射入個人首個英超入波,亦向前四邁進一大步。美聯社

每季當去到爭前四名時,阿仙奴就會拼發出萬夫莫敵嘅氣勢,唔止隊波會係咁贏,爭第四名嘅對手都會自己失分,故得「爭四狂魔」嘅外號,幾年前同護級嘅韋根並列為下半季英超最可怕隊伍。如今「護級狂魔」韋根已經唔喺度,但兵工廠仍然延續傳統。禮拜日,爭四對手修咸頓好似撞邪咁,俾史雲斯一腳搞掂,主場輸0:1;而阿仙奴就以5:0大破阿士東維拉,追到同修頓同分,如果唔係得失球差啲,呢輪已經上到第四位!
修咸頓主場對住天殘地缺嘅史雲斯,理所當然全場圍攻,控球比率有六成三,中目標射門都有六次,但前鋒加斯安奴柏利狀態麻麻,射咗兩腳都唔中龍,沙迪奧文尼後備入替射咗三腳,亦都入唔到。

0:1不敵史雲斯

相反,史雲斯全場得一腳中目標,就畀舒維爾喺八十三分鐘射入。結果臨尾仲有賴恩貝特蘭攞紅牌嘅修咸頓,贏形勢輸波,唔單止第三位不保,讓咗畀曼聯,第四位都危危乎,被阿仙奴追到同分。賽後,修頓領隊朗奴高文被問到呢場比賽輸波嘅原因,佢都𢱑晒頭,話真係輸畀運氣,「我哋踢得好好,尤其係上半場,製造到唔少好機會,但就係入唔到。對手就入到個靚波,總之最好運嗰隊贏咗波啦。」

雲格:唔諗爭冠住

修頓攻足全場但無啦啦啦輸波,而「爭四狂魔」阿仙奴就主場以5:0狂勝阿士東維拉,𠵱家追到同修頓一樣有四十二分,係得失球差一球,先至上唔到第四。英國啲記者都懶得問領隊雲格對爭四嘅把握,直接問佢有冇機爭冠軍;雲格就好謙咁話:「太早嘞!仲落後緊十一分,要佢哋輸四場而我哋贏四場先得喎。我哋保持好𠵱家嘅走勢先。」包埋英足盃,阿仙奴連贏五場,其中四場仲要冇失波,係英超近期狀態最好嘅球隊。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載