› 選擇地區
三藩市
紐約
洛杉磯
其他美國地區
香港 台灣 北美
 
2015年02月05日

求驗客手記:衝出香港赴美試腳
公民小將跟大哨搵食

又有香港球員有機會外流喇!去季效力天行元朗嘅港足U22前鋒許宏鋒,今季雖然「降呢」轉戰甲組公民,但多得巴西教練佐真奴搭路,下個禮拜六將隨朗拿度有份做股東嘅北美聯賽球隊勞德代爾堡前鋒跟操,成事嘅話,分分鐘仲做埋「大哨」隊友。

為圓夢拒「上山」

繼「神之子」歐陽耀冲之後,再有港將衝出香港,今季先苦後甜嘅許宏鋒笑言,有機會跟「大哨」搵食,心情既興奮又緊張︰「上季同元朗約滿後,因為同球會有啲分歧而冇續約,之後有其他港超球會斟介,但最後又因為其他原因而冇成事,最後冇班落轉戰甲組公民。但我季中喺南華跟操後,當時教練楊正光都話簽我,但估唔到就喺簽約前一日,佐真奴就話幫我搭咗路去美國跟操兩至三個禮拜;做球員都想衝出香港,仲要大哨有份做老闆,跟佢學到一招半式都終身受用。如果獲留用,除咗可以同魯爾同場鬥波外,仲有機會睇到下季轉投洛杉磯銀河嘅偶像謝拉特踢波,所以好快就決定放棄『上山』,去美國試腳。」

力求速度制勝

事實上,噚日先啱啱廿一歲生日嘅阿鋒,雖然今季降呢踢甲組,但依然冇偷懶,除咗跟公民操外,都仲有跟舊會元朗練足六日,操到咁「弗」,唔怪得上個月帶領公民贏足總盃初賽冠軍外,仲以十八球暫列港甲華人神射手首位。
面對美國重重難關,師承香港一代飛人何君龍嘅阿鋒,依然信心十足,期望以勞德代爾堡前鋒一紙長約,作為自己嘅生日禮物,「美」夢成真︰「我身形雖然未必及當地人,但我對自己速度有信心(百米跑十一秒二三),港田徑隊都曾經搵過我練跨欄,但因為太悶所以效棄咗,希望速度可以彌補身形同體能上嘅不足。」

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載