› 選擇地區
三藩市
紐約
洛杉磯
其他美國地區
香港 台灣 北美
 
2015年02月08日

體壇拾趣:失廿粒「肥東」:俾人笑當激勵!

「好假嘅肥仔」何東軒終於沉冤得雪!講嘅係上月學界元朗區男子乙組分組賽對公益社一場失足廿粒、成為網民熱話嘅張煊昌中學門將肥東,雖然俾人笑佢「企喺度想用念力控制個足球」,但佢噚日喺第二場分組賽改踢中場,令張煊昌一度踢少三人之下,都只係輸四粒畀陳呂重德,原來帶傷上陣嘅肥東話成件事只會激勵自己嘅意志,認真識諗!

改踢中場僅輸四粒

對於肥東上場好似「hea踢」咁,喺張煊昌做咗超過十年體育老師嘅林照明噚日亦解畫:「其實肥東上次守完頭兩、三球後,已經扭親雙腳,但我哋冇後備龍門;我叫佢頂埋全場,接到就接。而且對方(公益社)有唔少香港青年軍代表,我哋都預咗輸波。」
張煊昌噚日喺男乙第二場分組賽,開波時只得八個人到場,肥東就改踢中場,由身材較細粒嘅中三生羅志威把關。雖然踢少三個,但阿威都守得唔錯,踢完廿五分鐘半場只係輸0:3;下半場張煊昌臨時搵咗田徑同籃球隊隊員加入湊成十個人,可惜喺對方狂攻下都要輸多粒,五十分鐘完場輸0:4。十分滿分,林sir賽後就畀自己隊波七分:「輸波唔緊要,唔夠人唔緊要,最緊要有體育精神,好似肥東今日有幾球頭槌都頂得唔錯。」
至於讀緊中三嘅肥東話自己都睇過段片兩次,問佢會唔會好嬲放條片同笑佢嘅人,佢就話:「都唔會嬲,當係激勵囉!」下月五號,張煊昌將會喺兆麟運動場出戰最後一場分組賽對白約翰。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載