› 選擇地區
三藩市
紐約
洛杉磯
其他美國地區
香港 台灣 北美
 
2015年02月15日

索女馬主蔡加怡
有個超級巨無霸!

有「玩具大王」之稱的富豪蔡志明養馬多年,最叻係贏過六場嘅2006年打吡季軍「銀太陽」,只係輸畀一代馬王何鴻燊嘅「爆冷」不遠;而蔡志明三個仔女蔡加敏、蔡加怡同蔡加讚受到父親薰陶,亦對賽馬有興趣,先後成為馬主。其中蔡加敏運氣唔錯,曾有匹「靚到爆」六捷,收咗唔少獎金,蔡加怡嘅「萬能駒」五捷亦相當好。但蔡加讚暫時就唔係好得,現役嘅「車神」跑五場仍零獎金。
不過唔緊要,蔡加怡今期(15日)賽事有隻「巨無霸」在港初出跑三班1400米,隻馬來頭絕對唔簡單,上手馬主Laurence Eales在澳洲極具名氣,事關他買馬一向獨具慧眼,當年只花7.8萬澳元買入兩隻「街頭口號」子嗣,即是後來的「勁震撼」及「誰與同行」,結果兩駒橫掃澳洲多項經典一級大賽,包括墨爾本盃等,令Laurence Eales聲名大噪。而對上一匹經佢手運港嘅「開心至愛」亦取三冠四亞佳績。
「巨無霸」周歲價雖然僅1萬澳元,但在澳洲初出跑1100米排最外12檔,被迫留到最後,結果後發先至勝出,姿態甚佳。次仗增程跑1400米則放入季軍,兩仗路程不同,兼用不同戰略,仍全上名難度唔低,可見「巨無霸」潛質相當高。隻馬來港後進度亦佳,最近試閘騎落反應唔錯得第三,已有作戰水準,今場用到好手布文策騎,屆時凱旋門分分鐘見到靚女蔡加怡拉頭馬。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載