› 選擇地區
三藩市
紐約
洛杉磯
其他美國地區
香港 台灣 北美
 
2015年02月15日

求驗客手記:球星情人節鬥「閃」

球星們各自上載與摯愛共度情人節的相片,幸福滿瀉。互聯網

噚日係情人節,唔少球星都喺社交網站上載同伴侶或者屋企人嘅相,唔怕單身球迷嫌佢哋「閃」,祝fans情人節快樂!曼聯之前爆出有球員喺夜店廁所偷食嘅傳聞,可能朗尼都怕老婆懷疑,所以一朝早就喺instagram放相,向高蓮示愛。

朗尼post黑白相撐枱腳

喺情人節朝早九點幾,曼聯隊長朗尼就喺網上留言話:「祝我可愛嘅老婆高蓮情人節快樂!」佢仲放咗張同高蓮撐枱腳嘅合照出嚟。不過,我求大俠就覺得張相怪怪哋,首先佢校咗黑白效果,但係唔覺特別有feel;同埋驟眼望落去,高蓮個樣好似幾殘吓,好心朗尼用美圖app幫老婆執一執先啦。見到隊長放相後,馬高斯盧祖同戴利白蘭特兩位曼聯球員都喺instagram放上同愛人嘅合照晒幸福。
同樣一大早就向老婆示愛嘅仲有利物浦隊長謝拉特,「我靚爆鏡嘅老婆同囡囡,情人節快樂!」謝四真係有心,可能趁老婆居倫同三個女未起身,就去預備定四紮花,同埋禮物,放喺張飯枱度,畀個驚喜老婆同三位千金。
至於巴塞隆拿中堅碧基提早一晚就同女友Shakira食飯慶祝,多謝女友上個月底幫佢生多個仔。雖然生完只係半個月左右,但睇相見到Shakira都好省鏡。
有人話,囡囡係爸爸前世嘅情人,喺情人節,有唔少球星爸爸都同佢哋嘅「前世情人」晒溫馨,好似阿仙奴中場韋舒亞、皇家馬德里前鋒賓施馬,佢哋就上載同囡囡嘅合照上網,呢啲「閃光彈」,夠晒溫馨。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載