› 選擇地區
三藩市
紐約
洛杉磯
其他美國地區
香港 台灣 北美
 
2015年03月06日

南華預備組爆蠱惑賽果

身高一米八○嘅南華中鋒鄭禮騫(右),前晚踢預備組串演中堅就出事喇。資料圖片

預備組聯賽爆不尋常戰果?石硤尾公園球場前晚上演傑志對南華嘅預備組大戰,結果後者有鄭禮騫等六名港超球員出戰下,淨吞傑志八隻光蛋,加上有網友發現賽前國內博彩公司嘅盤口出現「大地震」,引嚟唔少花生友議論紛紛。

六港超兵上陣仍吞八蛋

海外一向有唔少莊家就本地波開賭,除咗港超、港甲外,就連預備組聯賽都有網上盤口。話說有網友發現,有博彩公司為前晚場「傑、南」大戰開咗個亞洲盤,平手盤嘅初盤,傑志水位由1.82倍被狂質到開賽前嘅1.18倍,明顯有人對藍衫軍充滿信心。結果僅有曾錦濤、張國明及杜瀚滔三個港超兵領軍嘅傑志,亦不負所託,以8:0大炒有鄭禮騫、李威廉、羅振邦、李毅凱、劉卓軒及地下浩多六名港超球員正選上陣嘅少林寺。
連同上場預備組賽事以0:6不敵太陽飛馬後,南華兩場吞足十四隻光蛋,難免令人懷疑。但南華教練顧錦輝解釋,「球隊兩閘同龍門嘅表現唔好,所以上半場輸四球勝負已分後,下半場已收起啲港超兵,結果就輸多四球。」至於前日一戰被安排踢中場嘅李毅凱亦呼冤︰「禮拜二先代表完港足U22友賽流浪,噚(前)日練完波再踢預備組真係好攰,加上傑志顏卓彬等年輕球員,技術各方面都比我哋嘅年輕球員好,只係冇諗過輸咁多。」

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載