› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

求驗客手記:解圍變波子機式彈入
紅人軒仔行運

佐迪阿馬特解圍竟然省中軒仔(中)反彈入網。路透社

好波不如好運,周一英超作客史雲斯嘅利物浦,利記成場波都冇乜料到,上半場一早應該落後兼打少一個佐敦軒達臣,偏偏大難不死,仲要下半場靠呢位代隊長一腳幸運波,1:0成功「食天鵝」,𠵱家追到同第二位嘅曼城只係差四分,莫講話前四,季尾拎番個亞軍都唔奇。

險踢爆舒維爾唔使領紅

紅軍係二○一五年搶分最多嘅球隊,由元旦日計起,十場英超攞咗廿六分。當然,佢哋呢段時間嘅表現真係突飛猛進,但有時作客就唔係踢得好好。周一場波就係咁,史雲斯喺上半場幾次攻勢,都足以收死紅軍,好似基菲爾施古臣喺三十七分鐘有球禁區外趟死角嘅靚波,咁都畀米洛列特飛身救到,而巴菲迪比高美斯同奇誠庸又先後敗家。結果去到六十八分鐘,佐敦軒達臣一次入楔,敵衞佐迪阿馬特已經早一步趕到鏟走個波,偏偏就彈中軒仔後再彈高,笠死埋門將法比安斯基入網,紅軍就靠呢個入球,最終小勝1:0。

值得講嘅係,軒仔呢場波真係夠運,佢喺開波廿九秒因舉腳過高,爭啲踢到舊隊友舒維爾個頭(圖),但球證開恩冇畀紅牌,如果紅軍開波唔夠一分鐘就踢少個,仲點靠呢位代隊長入波?
紅軍贏埋呢場,以五十四分守住第五位,追貼阿仙奴同曼聯,離第二位嘅曼城都係得四分之差。形勢上,曼城本來有力同車路士爭冠,但如果繼續低迷,隨時畀「三紅」趕過,連第二都冇埋,之前話有得爭嘅熱刺同修咸頓,因為齊齊失分,變得好抆水。難怪羅渣士賽後心都雄埋:「排名梗係越高越好喇!」「曼城輸波?正喎!我哋有機。」

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載