› 選擇地區
三藩市
紐約
洛杉磯
其他美國地區
香港 台灣 北美
 
2015年03月20日

咖喱牛腩:考慮史卡迪爾 - 咖喱

嚟緊星期日有兩場矚目大戰,分別係巴塞隆拿對皇家馬德里嘅國家打吡,同埋利物浦對曼聯嘅雙紅會。今日《咖喱牛腩》就同大家講吓兩隊嘅隊長;單憑印象,揀隊長通常一係揀最有領袖魅力嗰個,一係就揀最好波嗰個,最理想就係隊長可以帶動全隊,兼提升整體戰鬥力。
不過,隊長最緊要可以服眾,冇隊友支持真係講咩都假,所以有時能力同魅力都係其次,論資排輩先係最緊要,至少喺俾人質疑嗰陣,都可以大聲講句:「N年前我喺度踢波嗰陣,你仲喺邊度邊度執緊波。」利物浦嚟緊下季就會面對換隊長呢個問題,唔少人都認為佐敦軒達臣會接班,但小弟覺得不妨考慮史卡迪爾(圖)。首先史卡資格老,係少有經歷過賓尼迪斯時代嘅球員,又係防線核心,風格夠晒鐵血硬朗,紮住個頭上陣、即場縫針都試過,加埋成個惡漢咁樣,夠晒煞氣!喺謝拉特做隊長前,都係芬蘭中堅希比亞做,所以喺利物浦歷史,外援後防硬漢做隊長都唔係未試過。總覺得軒仔喺資歷方面未夠,不如等佢浸多幾年先都未遲。
至於曼聯就喺今季換咗隊長,由朗尼擔正,雖然朗尼係陣中第一球星,但佢真正上位嘅原因都係資歷,佢喺二○○四年就加盟曼聯,季初嗰陣,係得費查資歷耐過佢,但費查怪病纏身,真係好難搵佢做隊長,所以朗尼就順理成章上位,而唔係外界所傳嘅尹佩斯。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載