› 選擇地區
三藩市
紐約
洛杉磯
其他美國地區
香港 台灣 北美
 
2015年03月20日

Girl’s Talk:望巴神爭氣
捧利記必勝 - LULU

今年英超前四真係爭餐死,除咗車路士穩守第一外,曼城、曼聯、熱刺、利物浦、阿仙奴同修咸頓打生打死,正為明年踢歐聯嘅資格努力,呢六隊只係差八分,肯定有排鬥,可能要到最後一分鐘先分到高下。英超已經進入直路,每場嘅勝負、甚至每一個入球都好重要,可以話係打緊淘汰賽一樣。
今個星期大戰係利物浦對曼聯,直頭可以話係一場決賽。𠵱家排第四嘅曼聯,比第五嘅利物浦多兩分,呢場如果分唔出高下,最開心嘅就一定係阿仙奴、熱刺同修咸頓,所以我估利記同曼聯兩隊都唔會求和,一定會全力爭勝。呢場比賽,我有個小小嘅幻想,就係利物浦會用巴洛迪利(圖)打正選。好多人都知我鍾意巴神,佢今年表現的確一般,外界對佢嘅批評亦有好多。呢位話題人物早前喺社交平台放咗段片回應,佢話好多人都只係見過佢踢波,而唔係真正認識佢,更加未同佢溝通過、相處過。呢班冇同佢點講過嘢、又唔係點見面嘅人,點解可以講到好似好了解佢咁呢?如果今場巴神入波、仲帶領利記贏波,我相信會係巴神對所有批評最好嘅回應!
今場兩隊都開始上力,都幾難估邊隊會贏,不過利物浦球員信心似乎好啲,加上我非常希望巴神入波,今場入波其實唔使多,最緊要場波好睇,咁就算利物浦贏1:0都夠。

LULU
不懂踢波愛睇波

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載