› 選擇地區
三藩市
紐約
洛杉磯
其他美國地區
香港 台灣 北美
 
2015年03月25日

求驗客手記:史卡迪爾被秋後算賬
利物浦「傷紅匯」

利物浦輸完周日場雙紅會後,衰運開始降臨。除咗因踩人直接領紅嘅隊長謝拉特預計停賽三場之外,喺比賽末段有樣學樣嘅史卡迪爾亦難逃一劫,英足總已經決定起訴呢位中堅,睇嚟同隊長都同一命運,齊齊坐波監;加上傷兵潮亦湧現,拉爾拉拿、史杜列治同米洛列特都喺雙紅會後受傷,前兩者已經退出今期國家隊大軍。紅軍下周末火併阿仙奴前,起碼有五人掛彩(見附表),想縮窄同前四球隊嘅差距,真係凍過水!

踩迪基亞料停三場難鬥槍手

紅軍喺周日場雙紅會付出沉重代價,輸波後被曼聯拋離五分,本身爭前四嘅形勢已經唔多樂觀,但𠵱家可能仲頭痕,皆因英足總周一已決定秋後算賬,起訴喺比賽尾段蓄意侵犯迪基亞嘅史卡迪爾。事緣呢位中堅當時上前助攻嗰陣,唔收腳踩落迪基亞個膝頭哥,搞到呢位紅魔門將都起晒火,爭啲同佢開拖。
雖然球證當時唔知係咪因角度問題,冇察覺史卡迪爾呢吓收山腳,但賽後睇番重播就一清二楚喇。我求大俠覺得佢真係罪有應得,之前謝四因蓄意踩人被逐,有晒人辦佢睇,都仲係唔識死,唔單止自己有排煩,仲累紅軍輸晒風度,認真丟架!如果史卡迪爾落實停賽,相信同謝四一樣,都將會坐三場波監,亦即係話,下周末另一場對阿仙奴嘅大戰,唔使預佢兩個。

史杜又傷退出英軍

不過,停賽只係紅軍領隊羅渣士面臨嘅其中一樣麻煩,計埋傷兵就更加𢱑晒頭。除咗喺半場因傷退下火線嘅拉爾拉拿,史杜列治同門將米洛列特賽後亦報稱有傷,當中兩位英格蘭國腳都已經退出咗今輪嘅國際賽大軍,未知可唔可以趕及大戰前復出,據聞拉爾拉拿個傷勢嚴重啲,史杜列治傷勢就比較輕。
由於史杜列治唔打得,周二英軍進行首課操練時,俾傳媒贒到領隊鶴臣手中有張疑似周五迎戰立陶宛正選十一人嘅紙仔,當中有哈利卡尼個名,佢會同朗尼合作踢雙箭頭,大家信唔信呢?

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載