› 選擇地區
三藩市
紐約
洛杉磯
其他美國地區
香港 台灣 北美
 
2015年03月31日

求驗客手記︰最期待的畫面出現了
789閃耀晏菲路

星期日球壇最好節目,可能唔係歐國盃外圍賽或者有巴西亮相嘅友賽,而係由謝拉特隊對加歷查隊群星拱照嘅利物浦慈善賽。呢場波踢成2:2和氣收場,球迷見到蘇亞雷斯同費蘭度托利斯(費托)回歸晏菲路,又有亨利神級妙傳,仲有巴洛迪利冇乜幾可入波,一次過過足晒癮。

呢場利物浦全明星慈善賽,參加嘅球星除咗有一班謝拉特新舊隊友之外,亦有亨利、杜奧巴同埋泰利等好友嚟贈慶。只要捐一英鎊(約11.5港元)就可以透過官方網站睇呢場直播,相信香港都有唔少球迷支持。今季加盟一路都冇乜波入嘅巴洛迪利,喺開賽八分鐘就以一記遠射,幫加歷查隊先開紀錄;之後杜奧巴再建一功領先到2:0。完半場前謝拉特隊博到12碼,極刑梗係由大隊長親自操刀,追成1:2。已經退咗休嘅亨利都證明自己仲有料到,喺一次進攻當中扮射波,但其實係交波,呃晒全場,可惜接應嘅賴恩巴布唔生性射失咗。

謝四:感動到毛管戙

半場休息之後,紅軍球迷最期待的畫面出現了。謝拉特隊一口氣換咗七個人,其中蘇亞雷斯同費托就好有型咁,特登等到最後先入場。加埋謝拉特呢個「789」夢幻組合首次一齊合作,真係有今生冇來世,而對面嘅加歷查亦好識做,好令人懷念咁喺禁區侵犯阿蘇,輸12碼,結果謝拉特再操刀射成2:2和氣收場。
除咗費托同阿蘇,利迷仲見番包括沙比阿朗素同懷斯等唔少2005年歐聯奪標功臣,謝拉特賽後都話好開心:「呢場波真係冇得頂,最重要梗係達到做慈善嘅目的,全場爆滿,而我對紅軍球迷嘅熱情同支持就一路都冇懷疑過。成場波都喺好好嘅氣氛下進行,亦冇人受傷,我真係一路踢一路感動到毛管戙。我問過阿蘇同費托想唔想去射12碼,佢哋都耍手擰頭,我估佢哋唔想喺自己重返晏菲路個回憶度,有宴客呢件事存在。」

阿蘇𠱁fans非紅軍不返

作為紅軍近年最出色嘅兩名射手,唔理阿蘇同費托當日離隊嗰陣對利物浦球迷有幾大傷害,今次返嚟所有唔開心嘢都已經煙消雲散。費托賽後都話仲聽到有利迷歌頌佢覺得好感動;阿蘇就更識𠱁人,話有朝一日返英超嘅話,利物浦係佢唯一嘅選擇。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載