› 選擇地區
三藩市
紐約
洛杉磯
其他美國地區
香港 台灣 北美
 
2015年04月10日

咖喱牛腩:僱傭兵冇feel - 咖喱

嚟緊就係曼市打吡(圖),牽牛兄講開,話𠵱家啲大球會嘅打吡冇咁好睇,呢句話令我沉思咗一陣,因為我一直都冇話有豪門打吡會特別好睇呢種概念。

昔日曼城未夠班

曼城喺千禧年起穩定地喺英超出現,令曼市打吡成為每季都肯定有嘅比賽,但講真句,嗰陣嘅曼市打吡喺香港受關注程度唔高,一嚟曼聯同曼城實力差距大,上游對中游,就好似曼聯對西布朗咁,嗰幾季曼城作客曼聯都未贏過。二嚟,嗰陣香港嘅曼城球迷屬於好少數,冇啲對手球迷喺身邊鬥吓嘴,都唔過癮啦。對於香港嘅曼聯迷嚟講,最過癮嘅比賽應該係對利物浦或者阿仙奴,因為身邊朋友實有利迷、阿迷。
自從他信同蒙蘇先後入主曼城,間球會多咗啲球星,實力強咗,球迷又越嚟越多,本地報章開始做大,電視台宣傳增加,曼市打吡先變得好似好激烈。撇開呢啲場外因素,作為一個透過電視睇直播嘅球迷,小弟覺得曼聯對曼城,同曼聯對阿仙奴,或者曼城對車路士嘅份量、火藥味同好睇程度都係差唔多。
可能有人話打吡大戰嘅情緒同歷史底蘊可能感染到某啲球員,令佢哋落場踢得特別搏命,但你問我大衛施華踢曼市打吡係咪比踢利物浦、阿仙奴起勁?我又唔覺得。球迷同球員一樣,一定要喺充滿打吡氣氛嘅環境成長先會理解打吡戰嘅激情,但喺𠵱家,曼城同曼聯大部份都係僱傭兵,唔好話喺曼市成長,大部份都係呢兩三年先嚟英國,點會對同城打吡突然勁有feel?
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載