› 選擇地區
三藩市
紐約
洛杉磯
其他美國地區
香港 台灣 北美
 
2015年04月10日

咖喱牛腩:打吡欠球味 - 牽牛

喺小弟仲係小學雞嘅時代,去沙田係一個旅行節目,你哋冇睇錯,去沙田真係當去旅行;行程包括去彭福公園睇鸚鵡,去馬料水釣魚,最後到新城市廣場煞有介事咁睇音樂噴泉,然後到商場內老麥開餐。今時今日已經好少落新城市,不但因為自由行拉喼橫行,而且個商場已經好陌生,名店我冇興趣,樓上個餐廳群仲貴到唔合理,小弟食過間上海菜館,兩個人求其叫幾樣嘢兼食唔飽都收我幾百蚊,𠵱家連間老麥都準備唔做,真係連窮人樂土都冇埋。
就正如今時今日睇西班牙國家打吡、禮拜日嘅曼市打吡,係就係球星身價億億聲,但正如行廣東道呢啲名店區咁,觸動唔到小弟情感。坦白講,踢得大會嘅球星都有番咁上下級數,唔通C朗輸一兩場打吡、大衛施華一兩場打吡失準,就會俾球會雪藏冇得踢咩?根本對佢哋嚟講,打吡都只不過係一場份量多少少嘅比賽,掛住「打吡」個名咁解。

東北打吡認真到喊

相反二、三線打吡仲搵到啲真正大戰味,好似上禮拜日我就睇咗場幾過癮嘅東北打吡:新特蘭對紐卡素,無可否認兩隊星味欠奉,但就真係腳腳七注、飛砂劈石,新特蘭前鋒迪科爾(右二)入完波仲開心到喊,對上一次小弟記得入完波喊嘅球員,係由費倫天拿轉投羅馬嘅巴迪斯圖達,射入倒戈入球之後不禁流下英雄淚,可想而知新特蘭同紐卡素都對呢場打吡係幾咁重視。老套啲講句,希望禮拜日場曼聯對曼城,雙方真係畀到場好睇又有球味嘅打吡戰啦。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載