› 選擇地區
三藩市
紐約
洛杉磯
其他美國地區
香港 台灣 北美
 
2015年04月10日

體壇拾趣:高柏蘭中刀
兩花生「鷹」被捕

安迪(左二)同斯科路沙(右)六月開審,未知會唔會影響球隊打季後賽。美聯社

職業球員同夜蒲,似乎真係一個唔多正面但又好必然嘅組合。溜馬周三作客紐約人,小前鋒高柏蘭(Chris Copeland)前一晚冇乖乖哋喺酒店休息,反而約埋前女友去咗間著名夜店玩,點知離開嗰陣冇啦啦俾人用刀襲擊,左手手踭同腹部都受傷,好彩及時送到醫院,做完手術後情況穩定,暫時喺深切治療部休養緊。溜馬當晚場波,幾個球員就戴咗高柏蘭嘅招牌頭帶嚟支持佢,亦順利以102:86贏波。

斯科路沙、安迪疑阻差辦公

比高柏蘭受襲更離奇嘅係,鷹隊都有兩個球員因為呢單案而俾人拉咗。話說鷹隊周三晚都要作客位於紐約嘅網隊,斯科路沙(Thabo Sefolosha)同安迪(Pero Antic)又咁啱都喺現場見到受傷倒地狂流血嘅高柏蘭。不過,警方話當時叫咗兩位球星六次行開都冇人理佢哋,就以阻差辦公為由拘捕兩位。有傷在身嘅斯科路沙同安迪即日已經放番出嚟,但係就冇落場,不過鷹隊都成功險勝114:111。

究竟呢兩隻塘邊鶴當時搞邊科真係冇人知,有人估佢哋只係想保護同行,擋住圍觀嘅路人同記者影相啫。佢哋之後都透過球會發聲明,為影響球會同隊友嘅聲譽而道歉,但就強調冇犯事,一定唔會認罪喎。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載