› 選擇地區
三藩市
紐約
洛杉磯
其他美國地區
香港 台灣 北美
 
2015年04月12日

李嘉欣為愛駒改名
馬會居然唔批准!

有最美香港小姐之稱嘅李嘉欣,嫁入豪門兼成為馬主,得閒就入場跑吓馬仔,生活優悠。嘉欣BB上季贏過三場頭馬,今季就差啲,只憑「貳寶」季初由雷神操刀,勝出一場一班賽,眨吓眼至今已超過半年,嘉欣同老公亨亨未再拉頭馬。
今期(12日)日賽佢哋玩大堆頭,除咗嘉欣嘅新馬「駟寶」首次登場外,佢老爺許世勳一對愛駒「控惑」及「期惑」亦分途出擊,睇嚟唔係咁啱得咁蹺,而係練馬師告東尼刻意安排,希望增加許氏一族拉頭馬機會。
嘉欣之前一對馬叫「一寶」、「貳寶」,好多人預期佢嘅新馬會叫「三寶」,點知冇「三寶」有「駟寶」。據知嘉欣真係曾入紙,申請愛駒命名為「三寶」,但馬會唔批准,話怕同三寶彩池混淆,於是先有「駟寶」出現。
由於嘉欣嘅名氣,好多人都吼實「駟寶」,但老實講,佢嘅晨課走勢麻麻,八次試閘次次輸好遠吓,既唔覺有上佳狀態,亦冇乜速度爭1000米。反而尾場1600米老爺隻「期惑」,上仗打吡一級賽,抽最劣嘅14檔都追得唔錯,今次降呢爭二班賽,不但對手減弱,負磅更獲下調,改爭外地三捷嘅1600米,嘉欣可能靠「期惑」拉頭馬都未定。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載