› 選擇地區
三藩市
紐約
洛杉磯
其他美國地區
香港 台灣 北美
 
2015年04月26日

Sunday Fever︰
我們都是這樣跑大的 - 馬啟仁

跑步如人生,有人臨場借尿遁,有人瀨咗都照跑,各有各選擇。互聯網

小朋友明天第一次中學運動會,夜晚床上好緊張瞓唔着,作為過來人,梗係要扮晒嘢,講吓道理分享吓經驗。
「你覺得跑步緊張啲,定考試緊張啲吖?」唔使諗啦,有咩緊張得過考試呢係咪,我係咁諗。
「梗係跑步啦,咁多人睇住。」
「多人睇住就驚?咁你話上台唱歌由頭到尾咁多人望緊張,定係跑步最尾有觀眾緊張吖?」
「梗係跑步,準備起跑嘅槍聲咁大嚇死人呀!」
「點大聲都唔夠你睇煙花咁大聲啦。」
「點同呢,睇煙花你可以嗌出嚟吖嘛,跑步一聽見槍聲就要跑,好似做賊偷咗嘢咁俾人追囉。」
「又會變咗賊嘅,不如調番轉諗吖,當你自己係警察捉賊咁,會唔會好啲呢?」
「但好好地點解要捉人啫,我唔想同人哋鬥吖。」
「呢個世界就係咁嘞,周圍都係競爭,唔係你同人鬥,就係人哋要同你鬥㗎嘞。」
「咁唔係話做運動係為咗強身健體,對自己好嘅咩,點解又要變咗同人鬥啫?」小朋友好似啱喎,求學不是求分數,跑步唔係為獎牌,又係幾高尚嘅情操嚟嘅。
「不如你試吓咁諗,落場跑步嘅時候你唔係同人比較,係同自己比,要跑得快過以前嘅自己啫。」
「但係我覺得平時去玩會跑得快過參加運動會,因為唔知點解準備比賽前我都好想去廁所,好似成日都未預備好咁。」
「哦,其實你心理問題啫,大人做大事都會咁㗎,咁你習慣咗就唔會想去廁所嘞。」
「咁萬一真係跑跑吓想屙呢?」
「咁外國真係有跑手跑跑吓肚痛,但係佢唔想停低去方便,就一路跑一路屙,結果屙到成褲都係, 有人之後笑佢,不過亦有好多人讚佢夠投入呀。」
「爸爸你好似識好多嘢咁,你以前中學第一次參加比賽跑成點呀?」
「我當年跑一百米諗住贏,仲諗咗之後買咩慶祝,但結果跑包尾。」
「吓,咁我唔緊張囉,如果聽日我跑第尾,都係同你打成平手啫。」

KEYMAN
節目主持
電郵:keymansoho@gmail.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載