› 選擇地區
三藩市
紐約
洛杉磯
其他美國地區
香港 台灣 北美
 
2015年04月26日

Sunday Fever︰
買波從來難唔到我 - 梁栢堅

上個禮拜,好多人生活習慣上已經有輕微改變,就係凌晨12點睇《大時代》,基本上睇完你冇可能瞓得着,因為見到丁蟹集集打橫嚟,再加埋佢嘅扭曲思維,你會好自然諗起話「落區從來難唔到佢」嘅689、「警務人員喺認人時有權不合作」嘅禿鷹、「香港人飲東江水應該感恩」嘅元秋、「應該買國產水炮車招呼示威人士」嘅TREEGUN。試問由日頭對到夜晚都係呢類人,你點會瞓得好? 惟有由凌晨一點幾坐到三點等睇歐聯,球場,起碼仲有公平公正。
次回合依然好睇,巴塞果然冇因為之前贏PSG而「袋住先」,依然發揮水準再贏多兩球,非常正路。至於拜仁,上禮拜我在此欄貼過入球「大」,估唔到上半場已夠找有突,同首回合完全兩件事,霸氣返晒嚟之後,下仗對巴塞絕對係焦點,基本上已經可以當決賽咁睇,而球員亦都喺世界盃四強隊伍出現過,惡鬥也。至於皇馬,上仗對住馬體會真係有少少險,攻力夠強,奈何鐵壁下差啲連波都冇得入,買皇馬者真係驚足全場。皇馬下仗對祖記,亦未必贏得輕易,雖然好多人都當祖記透明,但佢絕對唔係劉江華。
唔講五月咁遠,今晚阿仙奴對車仔已經教大家睇得過癮,兩邊狀態不俗,可以博高賠率項目過關,串愛華頓對曼聯一場。雖然上仗迪基亞失手,但呢期佢當打,應該守得住。

梁栢堅
填詞人+彩池人

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載