› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

足動神經:
車仔很悶但很強 - 波神

當周日倫敦打吡完場笛響起,車兵,以泰利為首嘅一眾守將,即互相擁抱慶祝;眾將下半季高度發揮摩佬(圖)「守出冠軍」嘅重要指令,任務快達,不興奮才怪。
車仔𠵱家最快可以提早三輪(下周日)封王英超,過程比筆者想像中更輕易,佢哋更有力打破12/13球季曼聯埋單大勝曼城11分後,近10季冠、亞軍積分差距最懸殊嘅紀錄。摩佬領軍次季必捧聯賽冠軍的定律即將再一次應驗,但環顧主要對手,利記走咗阿蘇、曼聯易帥後上半季執唔掂、曼城主力老化;阿仙奴首循環大讓賽,痛失24分,計下半季至周日和車仔,大幅收窄到只共失八分,終力追不及。
相反車仔今季一出即放,季前買人眼光厲害;食英超回頭草嘅法比加斯暫交出16次助攻、歸隊嘅鋼門泰拔高爾圖斯,領車仔與修咸頓暫保持失球最少英超隊,以及上季西甲射球機器迪亞高哥斯達,甫加盟頭四仗已入七球幫球會全勝,係封王嘅基石。到季中,狠下決心放走另一攻擊主力舒賀爾尼,摩帥落柯打全民皆守,誓要保住優勢到尾。
站在投注角度,呢班波毫無霸氣,自從一月中大妙史雲斯5:0後,連埋周日作客和阿仙奴0:0,11戰未試過有一場聯賽贏多過對手超過一球。呢個咁「穩定」嘅走勢,相信周日坐在場內觀戰嘅前阿仙奴領隊格拉咸,喺80年代尾起帶「兵」,曾以悶蛋足球兩奪聯賽錦標,會有同感。
除咗主守,唔怕用冇鋒陣,摩佬最勁用人盯人;上仗突派泰利接班人葛特蘇馬推前任防中,嘜死曼聯費蘭尼,今場伊雲洛域喺右邊不斷侵犯阿歷斯山齊士,全場個人認為表現最好嘅無名英雄尼曼查馬迪,緊追奧斯爾,非常成功。
場外,𠵱家亦冇人夠摩佬拗,反寸阿仙奴錦標荒更悶蛋,佢贏!強調車仔係除曼城外,係攻力最強球隊(車仔今季暫入65球),佢贏!不過細心睇,車仔暫時得失球差正39球,同曼城對上三季兩度封王時,正65球及64球冇得揮;同前季曼聯奪冠入86球亦遜色得多。今季摩佬交到貨,穩奪國內雙料,但來季估計會為球隊加強進攻力度,減少無賴言論;最重要英超變得快,一季招式已老,必要再作部署博冧莊,否則似曼城,今季一敗塗地。
英超冠軍,近10年來來去去「兩曼一車」,但對上一次冧到莊已係08/09球季嘅曼聯;利物浦、阿仙奴同紅魔鬼今季衰前鋒唔夠級數,當中冇一人嘅入球數字躋進聯賽神射手三甲。今夏「單數年」並無重要足球大賽,佢哋主力嘅休息期會更充裕,如果買到個頂級前鋒番嚟,車仔個「大巴」陣唔係無敵。
𠵱家先係四月尾,英超已多變例行公事,非車迷會想,幾時先等到下季八月中開鑼?
文:波神

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載