› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

求驗客手記:
教到冇成績仲開P歡送
南華厚待馬里奧

季中接掌南華帥印嘅馬里奧,噚日證實聽晚帶埋對菲律賓環球嘅亞協盃分組賽後,就會提前解約,改教傑志今季亞協盃嘅同組對手、馬超聯嘅柔佛DT。「少林寺」啱啱先宣告四大皆空,轉頭馬里奧即刻拋棄班和尚仔另謀高就,最好笑係球會仲幫呢位阿根廷教練開歡送派對!原來,《食神》入面嘅方丈好小氣係假㗎。
南華前日喺足總盃四強以一球不敵東方,今季肯定四大皆空之後,馬里奧賽後一度話過自己因為掛住屋企人,所以教到季尾就唔會續約走人。點知嗰頭講完,馬來西亞同日就有報章爆料,指當地超聯球隊柔佛DT已經同教練賀德「分手」,教緊南華嘅新教練馬里奧就會喺禮拜五上任。

教馬超柔佛 明演告別戰

少林寺噚日喺京士柏運動場晨操,備戰聽晚喺旺角場對菲律賓環球嘅亞協盃分組賽,淨係見到助教列卡度主持操練。以為馬里奧已經執緊行李之際,呢位58歲前華倫西亞助教身穿便服,喺南華副領隊高志超陪同下現身球場;佢換番件球隊polo後,再透過翻譯解釋去向︰「我本來都諗住做到季尾,但噚(前)晚突然收到柔佛嘅電話,覺得係個唔錯嘅機會,所以今(噚)朝去搵足主張廣勇商量;好多謝張生亦肯畀機會我,畀我提前解約。」高志超補充話:「球隊聽(今)日會同馬里奧搞farewell party,佢帶埋對菲律賓環球嘅亞協盃分組賽後,禮拜四就會正式離港,球隊高層稍後先會決定邊個帶埋餘下賽事。」
教練跳船仲有party歡送,呢啲老細真係難能可貴。但上任教練楊正光季初被炒嘅待遇就完全唔同;佢夜晚突然收到球會職員電話,被通知即刻唔使教,想同球員講拜拜都冇機會,farewell就更加唔使諗啦。

威廉斥「責任上唔係咁好」

至於少林兵就各有睇法,翼鋒李威廉就話︰「教練離隊嘅消息都係啱啱先知。個人認為佢喺呢個時間走,責任上係咪唔係咁好呢?但佢要走都冇辦法,希望我哋餘下比賽打好啲。」連見慣世面嘅隊長陳偉豪都話:「球隊一季轉兩次教練又唔係未試過,但嚟緊仲要出戰亞協附加賽同亞協盃16強,唔多唔少都有啲影響,球員盡力去踢啦。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載