› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

體壇拾趣:
騎士晉級唔使預路夫

路夫(箭嘴示)左手俾奧利尼克扯到甩骹,見到佢個樣就覺得痛。

許志安有首歌叫《流淚行勝利道》,騎士啱啱就做咗個最佳示範。大超班嘅佢哋周日作客贏塞爾特人101:93,以場數4:0輕鬆晉級,繼續向總冠軍之路進發,但今場損兵折將,對嚟緊嘅東岸準決賽影響唔細。

騎士嘅全能大前鋒路夫(Kevin Love)第一節就傷出,左邊膊頭俾主隊中鋒奧利尼克(Kelly Olynyk)扯到甩骹。經初步檢查,路夫起碼要唞兩周,好彩嘅話都要去到東岸決賽先可以復出;佢賽後就鬧爆對方,根本冇機會爭到個波,都故意整傷佢。

兩將打茅波勢停賽

話對手打茅波嘅騎士,其實都唔好得幾多;倒戈嘅柏堅斯(Kendrick Perkins)做單擋嘅時候,乘機將對手克魯達(Jae Crowder)推落地,搞到雙方爭啲大打出手。雖然柏堅斯當時只係被罰一個技犯,但分分鐘被秋後算賬;路夫已經傷咗,若然柏堅斯都唔出得,騎士內線將會好脆弱。至於加盟騎士後翻生嘅JR史密夫(J.R. Smith),唔知係咪想幫隊友出氣,同克魯達爭位嗰陣,借勢摑咗對方一巴,即時俾球證吹二級惡意犯規而被逐,睇怕都要停賽。
另一邊廂,巫師周日主場再贏速龍,創隊史紀錄首次喺季後賽橫掃4:0晉級。西岸戰線就比東岸激得多,快艇作客贏咗馬刺後,場數打成2:2,周二返主場再鬥過;而小馬喺主場終於贏到波,不過仍然落後火箭1:3,嚟緊仲作客,要晉級真係唔易。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載