› 選擇地區
三藩市
紐約
洛杉磯
其他美國地區
香港 台灣 北美
 
2015年05月12日

求驗客手記︰寸足全場又拍掌
謝四不屑車迷

家陣成日話要包容和諧,周日車路士對利物浦場英超就做到晒──紅軍賽前夾道歡迎「冠軍車」,車迷又站立向謝拉特鼓掌致敬,仲要兩軍隊長各入一粒和氣收場……咪住先,謝四就唔係咁諗,你試吓一年前嗰吓跣腳俾車迷寸足全場,條氣點會順?

上年差唔多時候,謝四喺主場對車仔做咗跣腳主角;一年後主客互調,謝四變咗列隊迎接冠軍嘅配角。佢呢場夠爭氣,完半場前接應佐敦軒達臣罰球頂入,抵銷車仔隊長泰利嘅入球攞番一分,但落後四哥曼聯六分兼14個得失球差,出席來屆歐聯機會名存實亡。到79分鐘,謝四由盧卡斯入替時,見到史丹福橋球迷站立鼓掌送別呢位紅軍隊長,都咪話唔感動。

賽後指不會祝福車迷

記者賽後問吓謝四感受,點知佢話:「我唔會被引導去祝福車迷,佢哋今(噚)日做咗一次(鼓掌)係幾好嘅。得到利迷站立鼓掌會令我更高興;車迷展示過短暫嘅尊重,但佢哋全場都喺度寸我。」對於夾道拍掌,謝四就咁睇:「當你為其他人而做其實並唔好受,但球會一向表現出尊重,而且夾道拍掌係繼承傳統。」中立球迷或者覺得佢唔畀面,但我求大俠睇住部份車迷舉住勁似小心地滑路牌、寫有「睇住跣腳呀!」嘅標語,又狂loop唱足一年嗰首「跣腳歌」,係害群之馬定主流民意都好,難怪謝四唔領情嘅。

識睇,一定係睇足英台【英波Live】:
http://soccer.appledaily.com
http://bit.ly/engballlive

自己友搞事可以點兜?領隊摩連奴就邊話會掛住謝拉特,邊話球迷唱歌都係尊重「一位親愛嘅老對手」;火藥味亦喺網上蔓延,你話謝四16年都贏唔到英超抵俾人寸,我就話車迷用A4紙頹print標語超級膠喎。以39球超越愛華頓名宿安斯禾夫、打破英超後衞入球紀錄嘅泰利就理得你口舌之爭,周日晚即刻孖住老婆飛去杜拜嘆世界。
老將不死值得尊敬,年輕力量亦都湧現。車仔19歲防中羅夫度斯卓克首次英超正選就造出百分百成功傳送同鏟截,難怪摩連奴話佢未來一定係車仔一員。紅軍都有18歲前鋒謝路美冼佳亞後備登場,搞到巴洛迪利後備都冇;但呢位𡃁仔望落同另一新星佐敦伊比幾似樣,第日加埋史達寧同史杜列治,講波佬會唔會好頭痕?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載