› 選擇地區
三藩市
紐約
洛杉磯
其他美國地區
香港 台灣 北美
 
2015年05月19日

足動神經:頂級名帥都係一嚿「雲」 - 波神

雲格(圖)同雲高爾合共累積逾半世紀嘅歐洲頂級球會領軍經驗,有時候都係一嚿雲。
今季英超兩大門神,年青有為嘅車仔泰拔高圖爾斯同曼聯迪基亞一時瑜亮,異議不多;曼聯周日俾阿仙奴逼和,追唔到個季軍,初領軍嘅雲高爾來季助紅魔重返歐聯,總算達標;不過鋼門迪基亞,季後離隊嘅新聞突似成定調,20萬鎊周薪續約,都敵唔過還鄉投皇馬嘅魅力,雲高爾呢着應該失預算。

雲高爾失預算

老退嘅尹佩斯、膝傷好唔番嘅法卡奧、唔聽話嘅迪馬利亞,通通可走,但係迪基亞今季聯賽全列正選,截至周日,37場聯賽錄得93次撲救,比泰拔高圖爾斯多出20次,係雲帥嘅最強護身符,地位之高等同朗尼。年頭只簽咗18個月約嘅「域陀」有十字韌帶重創陰影,唔會係雲帥嘅首選,但要搵個鋼門替鋼門,唔容易。
禮拜日場波,喜見紅魔一眾年輕球員踢咗半場好波,逼到阿仙奴上半場錄零射門,菲爾鍾斯、戴利白蘭特、馬高斯盧祖同安達靴里拉,來季會保得住正選位;不過一眾生牯仔耐戰力似乎非常一般,尤其貴價左閘盧祖,今季只正選上陣19場,踢到季尾,仲有疑似抽筋(或因傷)被換出嘅鏡頭,係阿仙奴周日扳平嘅間接因素。
去年夏天,雲高爾忙於荷蘭世界盃大業及餘興,連紅魔開操都要傑斯頂住檔;來季要應付兩邊戰線,唔能夠再一嚿雲,好似季初揭幕戰主場負史雲斯咁肉酸。

雲格排陣保守

雲高爾係英超新丁,仲可以有進步表現,但係帶領嘅阿仙奴已連續10季緣盡英超錦標嘅雲格,有人認為今季對比上季進步,起碼由第四上第三;但係季尾追唔到曼城攞亞軍,再被「冠軍車」拋離十多分,就算月尾冧莊捧足總盃,成績都唔會令擁躉太滿意。雲格排陣保守、應變慢一向為人詬病,禮拜日如果一早肯放禾仔出嚟,畀番艾朗藍斯踢中場中間,末段反勝紅魔機會好大。艾朗藍斯,3年前擔任阿仙奴正選後,筆者一直密切注視,為遷就奧斯爾,被迫踢右翼,雲格可能仲覺24歲嘅藍斯仔未係時候,但呢位自律沉實嘅威爾斯人,相信會係球會未來隊長嘅大熱人選。
阿仙奴明晚英超補賽鬥新特蘭,冇乜賣點,雙方都係一分夠數,賠率又一面倒,無謂重押感情票。重心不如選同時間上演嘅意大利盃決賽,季尾波最重氣勢,祖記少讓主場拉素平/半,可取上盤。
文:波神

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載