› 選擇地區
三藩市
紐約
洛杉磯
其他美國地區
香港 台灣 北美
 
2015年05月23日

足動神經:
修咸頓勇撲藍月博高收
- 波神

英超明天煞科,好戲唔多,當中排第五至七名爭兩個歐霸位,從賠率加上戰意取捨,重心博上次狂勝嘅南軍修咸頓,北伐「二哥」曼城起碼保不敗,後上取來季歐霸席位。
對衞冕曼城,跌一級攞今季亞軍,失敗一季;但對修咸頓,今季座底攞該會史上最高嘅英超第七,加埋季前放走多位主力套現仍頂得住,比上季埋單攞第八更出色,夢幻一季咯。這支南軍上仗主場謝幕,喺上半場已靠塞內加爾射手沙迪奧文尼(左)閃電中三元下領先5:1,終大炒原來事後先知輸100球都會照護級成功嘅阿士東維拉,近月英超開「其他」波膽,除曼城大炒過昆士柏六球外,絕無僅有。
南軍主場大捷謝幕有晒交代,今戰本無甚可取,但由於利記同熱刺聽晚分別作客史篤城同愛華頓,失分機會甚大,亦唔多似好恨踢歐霸;現時喺得失球有絕大優勢嘅修咸頓,作客曼城若能爆冷起碼取一分,有機會再上一層樓,來季亮相歐洲,主帥朗奴高文今夏將獲會方大開水喉擴軍。仲有就係,另一南軍般尼茅夫已奪來季升英超資格,修咸頓要搶客,球隊戰意續不用懷疑。

曼城主場連勝有疑點

作客到五連勝、近績英超最銳嘅曼城,搶分當然唔易;但細心看曼城今季主場已失12分,比上季奪冠時只失五分大幅退步,仲有係季尾賽程有利下,近六戰聯賽主場全勝屬現時排積分表下半版球隊,出色戰績有疑點。隨住阿仙奴連場失分,加上藍月射手阿古路已穩取神射手獎,曼城無甚可爭,領隊比歷連尼都係等油王老闆「定生死」;既然「冠軍車」剛戰都可吞三蛋敗走西布朗,曼城迎實力屬前列嘅修咸頓,稍一鬆懈,難擋由正銳嘅兩隻「沙」字頭快馬,沙恩朗同沙迪奧文尼帶動嘅修頓鋒線,今場入球「大」穩開但嫌熱,推介2.5倍[+1]同波膽。
再選,博後顧英足盃決賽嘅阿士東維拉,主場迎篤定降班嘅般尼開入球「細」,作過關穩膽。被大炒過後,維拉防線會打醒精神,遇入球能力弱嘅般尼,穩打穩紥等爭盃好咯。至於尾門,下周一升班附加賽生死戰,博前線射手多嘅東北軍米杜士堡贏諾域治,平手坐和望贏。
波神
神級攻略 智破足彩

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載