› 選擇地區
三藩市
紐約
洛杉磯
其他美國地區
香港 台灣 北美
 
2015年05月26日

足動神經:冠軍早定 英超失色 - 波神

聯賽排名一級約值120萬鎊,作為職業球員,理應努力為球隊爭取最高收入,但今屆英超一早大定下,體育精神沒剩幾多,精采比賽大減,令人遺撼。
「冠軍車」奪得約2,400萬鎊獎金,包尾嘅昆士柏只得100萬鎊多啲,多勞多得,連埋分得嘅天價電視台轉播費,肥咯。車仔未計喺轉會市場嘅純利,估計今季埋單成億鎊收入;但由於單數年,既然大局早定,列強喺歐洲賽亦全部早出局,英超季尾波有幾精采,球迷心裏有數。
送走嗰老將謝拉特,睇唔住嗰新星史達寧,本欄早兩個月前已提過,史達寧份約傾唔掂,領隊羅渣士會有麻煩;結果利記季尾嘅戰績插水,去季還是紅軍未來希望嘅羅帥,煞科戰輸到咁大鑊,份工都未必保得住,管理手法差「師父」摩佬幾班。英超市場繼續膨脹下,就係生了未紅先驕呢類「史達寧畸胎」。
侯城降班,衰自己。還記得前曼聯名將、領隊布魯士,喺今季最後一個空檔,被偷拍到頂住個大肚腩去度假「炸水」嗎?點解高層要喺三月份已急不及待同佢續三年約?結果「老虎」主場輸畀般尼,再爆出中場主將積基李華摩亞被驗出吸食過可卡因,震散隊波。再回看一眾費Sir麾下嘅曼聯名宿,教波真係唔多掂喎。
下游好似阿士東維拉同李斯特城,季尾如箭追上,但也多得一早上岸嘅中游隊長期hea踢。最終排第10至13名嘅水晶宮、愛華頓、韋斯咸同西布朗,最後六場計,共輸掉12場;僅比尾四隊輸少一場。呢種唔尋常情景,以前常出現喺西甲同意甲,英超所牽涉嘅利益實在太大。最怕,仲係有一天出現打假波新聞。
年輕有為,今季長勇數來數去得個土炮哈利卡尼;但老兵戰至最後,最值尊重。「雙特」煞科戰入波,留美好回憶,掌聲最多還是要給紐記嘅約拿斯古迪利斯,除了打敗癌症仍能馳騁場上令人敬佩外,其實佢同暫代領隊卡華早前已不咬弦,一度被貶後備,但周日仍能搏老命,交一助攻一入波,替紐記保住數千萬鎊收入。肥佬班主狂言,唔攞錦標唔賣盤;人無恥便無敵,紐記躉,準備坐多次過山車!
英超來季八月八日開鑼,中國人嚟講,好意頭;但站在球迷角度,輸贏其次,只希望睇多啲好波,吸引更好頂級球星加盟。情意結,英國波,港人還是最疼!
文:波神

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載