› 選擇地區
三藩市
紐約
洛杉磯
其他美國地區
香港 台灣 北美
 
2015年05月31日

Sunday Fever :
球壇小人靠丁蟹 - 馬啟仁

球壇強人多,古迪利斯係其中一個,但小人可能仲多。資料圖片

近排球壇小人當災,好在佢哋都識搵丁蟹辯護啫,好交個咪畀丁蟹大律師。
各位「扭家嫂」嘅球迷,其實你哋唔諗吓,喺約拿斯古迪利斯病到隻積咁嘅時候,我哋阿肥仔老細其實非常宅心仁厚,雖然冇幫佢畀醫藥費,但係並冇趕佢走喎。古迪利斯好番之後孱孱哋,我哋建議佢去第二隊踢,係為佢好咋喎,如果唔係佢邊有得出場操弗啲呀,用心良苦㗎。
最尾呢場波,古迪利斯係好叻仔,又入波又助攻咁,但係點解佢仲要踢晒成場呀,我哋扭家嫂咁多好球員唔用而用佢吖?就係畀佢爭取表現,等其他球隊睇到佢係掂嘅,你估我哋要靠佢入波先護到級咩?我哋last場波和都夠數啦!
你睇我哋肥仔老細幾時有出嚟話要解釋啲咩㗎,唔通有錢就要養你過世呀?咁所以你哋就淨係同情晒多多嘢講嘅古迪利斯,古迪利斯捱咗一陣咁就話走就走,阿肥仔老細仲要留喺度比你哋柴佢台,有排受呀,好在佢有錢可以搵錢買番啲歡樂紓吓壓啫,喂各位陪審員,有錢冇罪㗎喎!
至於FIFA嗰單,我當事人阿白老大就仲無辜。家陣係有FIFA嘅人畀人拉咗,但係只係指控咋喎,未告得入㗎喎,冇理由就當正我哋身有屎先得㗎,就算真係告得入呀,都可能係冤獄嚟㗎,美國佬啲嘢你點知咁多吖,佢哋啲足球搞極都搞唔起,妒忌我哋FIFA搞得好之嘛。我夠話佢啲NBA假啦,成日最後一秒先嚟射個攞命三分波,咩呀,做戲呀?特技呀?
唔好意思講番我當事人阿白老大先,雖然FIFA咁多個畀人拉咗,但係冇拉佢喎。啲人話FIFA又收枱底錢又內定賽果,白老大聽到都好痛心,但正所謂樹大有枯枝,屋企阿仔做壞事,係可能做壞事啫,老竇都好唔開心㗎。
講番正題,我當事人係清白嘅,佢啱啱冧莊做主席,因乜大家瘋狂咁插鬼佢喎,家陣係對面個約旦王子自己識趣退選咋喎。白老大唔細㗎嘞,要撇好易,留低先難呀。你睇佢當選嗰吓大嗌Let's Go FIFA,就知老人家79歲人仲幾激情有火啦!
剝花生嘅朋友,嗌幾大聲都係噪音,冇咩用嘅,要好似我丁蟹咁有point先得㗎嘛。

KEYMAN
節目主持

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載