› 選擇地區
三藩市
紐約
洛杉磯
其他美國地區
香港 台灣 北美
 
2015年06月03日

求驗客手記:皇馬孖寶強國化
巴利鳩嗚C朗尿尿

強國遊客之前成日喺香港遊客區隨地大小二便,好多香港人不滿,商務及經濟發展局蘇局長就叫大家包容吓。點知堂堂三屆金球獎得主基斯坦奴朗拿度(C朗),周一凌晨喺法國夜蒲後周街屙尿,仲俾狗仔隊影到,唔知法國有冇局長叫法國人包容吓呢?

C朗夜蒲通街屙尿

西甲煞科,歐聯決賽又冇皇家馬德里份,C朗已經開始放暑假回吓氣,佢就揀法國南部聖特羅佩度假,日頭遊完船河、曬完太陽,夜晚最好就梗係去蒲,周一凌晨四點幾,C朗同兩位男性朋友喺當地夜總會玩完準備返酒店,C朗唔知係唔係飲大咗兩杯急尿,就貪方便揀泊喺附近兩部私家車中間小解,仲搵埋老友睇水,點知都驚動夜總會保安,保安立即趕C朗走,佢嗱嗱聲拉番褲鏈走人,但應該都冇洗手。C朗以為神不知鬼不覺,但都係俾狗仔隊影晒相。作為咁多年輕人偶像,C朗都咁不雅,真係失禮。不過睇C朗個款,嚟到法國應該都使唔少錢,屬高消費客人,唔知法國局長又會唔會好似香港嗰啲局長咁好客,叫法國人包容呢?

巴利出城即掃火腿

講開強國遊客壞習慣,隨咗周街大小二便,瘋狂「鳩嗚」都係。皇馬另一個翼鋒加里夫巴利,亦都頗為強國化,日前就喺個人Twitter,上載自己去馬德里超市鳩嗚時,買一大隻西班牙火腿。雖然西班牙火腿真係當地特產,但巴利假假哋都喺西班牙生活咗兩年,好似未見過世面咁,呀,佢又會唔會當西班牙火腿係水貨咁,運番幾隻返威爾斯呢?
講開皇馬翼鋒,英格蘭新星史達寧就可能成為下季皇馬新翼鋒嘞。英國《太陽報》周一報道,皇馬準備用4,500萬鎊(約5.3億港元)收購呢位20歲球員,仲話皇馬元老隊6月14日主場對利物浦元老隊,史達寧會隨軍出發,傾吓轉會咁話。皇馬新帥好大機會係賓尼迪斯,呢位前利物浦領隊都叫做慧眼識史達寧,提出收購真係唔出奇。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載