› 選擇地區
三藩市
紐約
洛杉磯
其他美國地區
香港 台灣 北美
 
2015年06月20日

求驗客手記:
足球訓練中心終動工
2017一定要得

講咗十年,一直只聞樓梯響嘅足總將軍澳足球訓練中心,我求大俠就收到消息,有關方面決定簡化工程,宿舍等配套全部唔搞住,如政府願意將呢幅上年撥咗入《活化已修復堆填區資助計劃》剔番出嚟,就有機會係今年展開工程,估計兩年後就可以搞掂,即係2017有得用嘞!

先起球場 宿舍hold住

足總下星期就舉行董事局選舉,主席梁孔德(小圖)早前話如果成功連任,希望可以喺任期內搞掂足總嘅將軍澳足球訓練中心。據聞,特區政府、香港足球總會同負責畀錢興建嘅賽馬會,都唔想呢個計劃再拖落去,決定拍板簡化訓練中心嘅設施,初步構思就係唔起宿舍先,而之前構思嘅行人天橋、路道等配套全部唔起住,嗱嗱臨起咗三個真草場同三個仿真草場先,畀足總唔同級別代表隊有場練波。足總CEO薛基輔噚日話現階段無可奉告,要等有關方面公佈。
其實呢個足球中心,由前足總主席康寶駒喺2005年爭取到政府撥地畀足總開始,點知批咗咁耐都未知幾時可以動工。據聞計劃有唔少配套,包括興建可供球隊入住嘅宿舍等,如果做齊呢啲,就由原本一億幾港元嘅建造費,大幅增至超過六億港元,最大鑊仲要等政府幾十個部門審批,通過晒相關程序,港隊都唔知幾時有自己嘅訓練場用。

主席:做完政改應搞民生

梁孔德噚日同我求大俠講,訓練中心將簡化設施,至於幾時可以展開工程,就要睇政府可唔可以將呢幅體育用地剔出《活化已修復堆填區資助計劃》。佢話:「政府做完政改,應該集中搞民生,如果順利將將軍澳呢塊地剔除堆填區資助計劃,就有機會今年動工,估計工程要兩年,即係2017有機用得!」
講真,要搞好足球,如冇硬件,好難搞得好,而港足啱啱喺世界盃外圍賽連贏不丹同馬爾代夫,掀起全城「撐自己友」效應,勢頭的確唔錯,希望呢個訓練中心可以快啲上馬。
講開港隊,「賽馬會青少年足球發展計劃-暑期推廣2015」亦受惠於呢股港足熱潮。我求大俠收到風,呢次推廣計劃截至噚日,已經收到8,400位青少年報名,多過上年同期成千人;足總估計突然多咗咁多青少年暑期報名學踢波,同近期全城撐香港足球有關;計劃下星期一截止,如果去到9,000人報名,足總高層應該飲得杯落。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載