› 選擇地區
三藩市
紐約
洛杉磯
其他美國地區
香港 台灣 北美
 
2015年06月22日

求驗客手記:百cap戰成集郵騷
美斯榮登男神

邊個係美洲盃男神?梗係美斯啦,好似上周六場分組賽,阿根廷贏咗牙買加1:0,首名出線。雖然美斯踢得麻麻哋,但牙買加嘅球員波都未踢完,就搵定美斯換波衫,完場後,仲即刻變身小「粉絲」,圍住美斯玩selfie。

表現失色僅勝牙買加

呢場係美斯第100次為阿根廷國家隊上陣,係一個重要里程碑,但呢場佢就冇咩亮點。阿根廷靠希古恩入波,小勝牙買加1:0,三戰得七分,攞到B組首名出線八強。即使美斯唔喺最佳狀態,但冇影響一班牙買加球員對男神嘅崇拜。當球證一吹哨子完半場,牙買加嘅10號仔麥安拿夫即刻走去叫住美斯,同男神講定,要同佢交換球衣。美斯件波衫真係個個爭住要、冇得等㗎,所以唔早啲book定,真係好易俾隊友搶咗去。
牙買加喺呢次美洲盃純粹陪跑,三場分組賽輸晒排包尾,但一班球員賽後都冇話好失望,一來一早預咗,二來可以同男神踢波,已經開心死。場波一完之後,佢哋就由美斯嘅敵人變成「粉絲」,其中最醒目嘅係前鋒迪桑布朗,佢唔等美斯入球員通道,就喺後備席拎住部手機衝出去球場搵美斯,嚟張自拍。之後迪桑布朗行到去混合採訪區,仲好威咁向傳媒大晒佢同美斯嘅合照。

尼馬上訴為踢決賽

美洲盃除咗有美斯呢位男神外,仲有位女神,就係智利《花花公子》女郎丹莉娜,相信大家都聽過吓佢個名,佢早排自爆同基斯坦奴朗拿度(C朗)有段情,話C朗同艾琳娜拍緊拖嗰陣,佢兩個已經搞埋一齊。日前,有傳媒選咗丹莉娜做美洲盃新娘,做咗美洲盃最索女球迷。雖然佢係智利人,但阿歷斯山齊士唔係佢杯茶,佢話自己最鍾意就係美斯。
除咗男神女神,今屆美洲盃都有啲過街老鼠,例如冇球品嘅巴西前鋒尼馬。尼馬早前喺對哥倫比亞場波完場後,特登用波省對手,好似撩交打咁,最後被南美足協罰停賽四場,緣盡今屆賽事。不過,巴西足協搵埋律師,幫尼馬諗緊計上訴,希望可以減刑到三場,等尼馬有機會踢決賽,當然,前提係巴西生生性性入到決賽啦。

識睇,一定係睇足英台【英波Live】:
http://soccer.appledaily.com
http://bit.ly/engballlive

蘋果20年 企硬我敢言
http://20.appledaily.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載