› 選擇地區
三藩市
紐約
洛杉磯
其他美國地區
香港 台灣 北美
 
2015年06月22日

頂磅大外檔彈甩贏!
翻版步步友 三戰保持不敗

潮流興一日三捷,雷神同蔡約翰今日跑完上半場,各自揸住兩win等食大三元,結果第七場三班草地千二米,佢哋合作之大超班馬「澳斯卡」,大熱只1.6倍,無懼場地變化同首次孭133頂磅,最外12檔起步,改跑法不留而前置,沿途外叠望空追趕放頭馬都照贏,仲要拉士彈甩收韁贏三個半馬位,勁到無倫,三歲新星5月初才開始上陣,短短個半月內三戰全勝,經常「行」過對手,難怪有「翻版步步友」之綽號。
「澳斯卡」三場加埋贏咗八個馬位,今次賽後多數再加十分以上,大有機會爭做今屆最佳新馬。
雷神穩做今日騎師王,蔡約翰截至此場維持落後大摩兩win排第二。
「澳斯卡」由大馬主蕭百君細仔蕭劍新擁有,蕭家今季馬運亨通,蕭百君同三子女劍平、劍瑩、劍新,縱不計團體馬,加加埋埋已經贏咗12win,其中蕭劍新剛周三晚至贏完「醉中意」,話咁快今日又贏「澳斯卡」,旺到不得了!
今場有「澳斯卡」一柱擎天,落飛黨照重插其他馬博大霧,其中着啡燈之「健康歡笑」臨尾追過「愛寶」跑第二,後駒力拼只得第三,第四名係另一匹綠燈馬「傲飛星」,四重彩11,181元。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載