› 選擇地區
三藩市
紐約
洛杉磯
其他美國地區
香港 台灣 北美
 
2015年06月24日

今次真係要「等埋發叔」咯!

建制派一聲「等埋發叔」,集體離場未有投票,搞到政改方案戲劇性僅八票贊成。如果馬會有樣學樣,咁今期(24日)夜賽隨時延遲開跑都似,事關發叔愛駒「驪龍」將於第一場上陣,佢老人家呢輪行路慢咗啲,上周末端午節屯門龍舟比賽,佢身為主辦單位永遠會長,同新任鄉議局主席乖仔劉業強都齊齊甩底,而且周三晚可能落大雨塞車,萬一發叔趕唔切到場督師,班騎師傻到學班議員「等埋發叔」先跑,你話係咪好滑稽先?
呢場大龍鳳搞到葉劉等人淚如雨下,跟手田北辰連大佬田北俊都插,田少隻「人民武士」日前成功開齋,田少當日親自拉頭馬,本來心情靚靚,點知家陣「人民冇事」卻變成「兄弟有事」。
講番發叔,一把年紀難免逐漸淡出政壇,好似田少咁拉吓頭馬咪仲開心,佢隻「驪龍」初跑2200米表面冇根據,但要留意練馬師李易達季內五次派馬角逐谷草同程賽事,拎到三冠兩亞全入Q,好似「匯聚力量」,最近正喺此程打破悶局。「驪龍」今季初四班都贏到,家陣喺五班其實好有分量。
「等埋發叔」先開跑就冇乜可能嘞,但如果「驪龍」贏咗,咁就真係要敬老「等埋發叔」,等佢慢慢行過嚟凱旋門拉頭馬!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載