› 選擇地區
三藩市
紐約
洛杉磯
其他美國地區
香港 台灣 北美
 
2015年06月24日

求驗客手記︰雲達沙反轉完旺角
根度簡今尖嘴現身

前曼聯門神雲達沙前日突襲香港,野生捕獲「神沙」嘅晒命相傳遍fb。部份球迷估到偶像入住旺角朗豪酒店,噚日一早去門口追星,又真係畀部份人拎到簽名。不過雲達沙噚晚已經離港。大家仲想追星,今日可以去圓方同ICC(環球貿易廣場)一帶哺住噚日由上海出席完活動,嚟港度假嘅多蒙特球星根度簡!

簽名合照有求必應

荷蘭籍嘅曼聯一代門將雲達沙2005年訪港獻技,墟冚場面相信球迷都歷歷在目,但今次呢位44歲退役球星,據稱就係帶埋老婆囝囝來港度假。雖然係私人性質,冇任何官方活動,但醒目嘅球迷都冇走寶。前晚網民瘋傳同雲達沙合照,野生捕獲地點遍佈W酒店、朗豪坊,連女人街都有。相入面嘅雲達沙笑容十足,親民程度拍得住發哥。
而一班球迷當然唔會錯失良機,估到偶像下榻朗豪酒店,噚日晨早先去W酒店等,見唔對路晏晝就去朗豪酒店門口追星。據聞等到晏晝五點幾,雲達沙拖住老婆返酒店,見到fans等咗咁耐,都逐一幫佢哋簽名表現nice爆。有個小朋友拎條紅魔底褲出嚟,雲達沙仲搞笑咁問有冇着過先幫佢簽。

之後有傳雲達沙七點會離開酒店,搭飛機去廣州繼續中國之旅,有球迷放工急急腳趕到,可惜到七點半酒店職員話呢位球星已經離開,搞到班球迷鬼咁失望。球迷趙先生帶咗成廿件珍藏波衫,諗住可以畀偶像簽名同埋合照,最後都陰公豬撲空,坐埋一邊逐件摺番入袋。
至於另一個球迷阿文都話:「上年暑假曼聯拉隊訪港,我都簽到唔少球星,今次帶埋件簽名波衫,可惜等咗成個鐘都拎唔到簽名。」「神沙」引起追星潮,前港足門神范俊業去到日本,都野生捕獲現役西班牙國腳佐迪艾巴。

識睇,一定係睇足英台【英波Live】:
http://soccer.appledaily.com
http://bit.ly/engballlive

根度簡接力來港度假

「神沙」離港後,隨即有效力德甲多蒙特嘅根度簡接力,佢噚日從上海嚟香港,仲不忘喺下榻嘅Ritz Carlton酒店內同香港出名嘅夜景合照,佢話呢次來港係「放假同處理私人事務」,後日就會走人;球迷想知呢位球星最新動向?記住留意《蘋果》即時新聞喇!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載