› 選擇地區
三藩市
紐約
洛杉磯
其他美國地區
香港 台灣 北美
 
2015年06月24日

栢案驚奇︰等埋發叔症 - 方栢翹

我夠膽肯定,上周有份「等埋發叔」(圖)的議員,唔係真正香港人!因為係香港人都知道乜嘢係「食住等」;邊有人食飯等人會成枱人走晒出酒樓門口等?同樣道理,議員們大可坐喺議事廳發言「講住等」,何須還剩廿秒先拉隊走人?如果「等埋發叔」係一種病症,仲傳染咗去體育界,會發生乜事?

包越位

某年英格蘭於世界盃關鍵分組賽,泰利突然發號施令佈越位,點知得車路士隊友加利卡希爾響應散出嚟;巴尼斯話:「距離太遠喇,聽唔到隊友噏乜!」里奧費迪南話:「我覺得呢個關鍵時刻應該留喺禁區;事後檢討亦認為呢球無必要裝越位。」結果留喺禁區包越位嘅球員,累英軍輸波出局。

零秒出手

NBA總決賽第七場最後三秒,落後兩分既勇士經過隊友10個單擋,終於造出空位俾居里三分線起手;豈料此時居里瞥見觀眾席的父親戴爾竟在彎腰執銀仔;居里希望「等埋老竇」親眼睇住自己射入呢球絕殺,結果攬住個波直到完場鐘聲一響……

等埋總理

里約熱內盧奧運100米決賽,各選手已於起跑線準備就緒;點知牙買加總理趕緊入會場,想親眼睇住保特衝線。保特見總理一場嚟到,決定「等埋總理」,結果佢等咗10秒先起跑,對手已經衝晒線......
喺分秒必爭既體育界,染上「等埋發叔症」真係好大鑊;最慘係,呢個病同人另一種名稱只得一個字的「症狀」一樣,都係冇藥醫。
方栢翹
now足球評述員

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載