› 選擇地區
三藩市
紐約
洛杉磯
其他美國地區
香港 台灣 北美
 
2015年06月29日

體壇拾趣:
方駿宇開齋揚威日本

開齋喇!港產F1蓮花實習車手方駿宇(Adderly),周日以桿位出戰GT亞洲系列賽日本岡山站第四回合,最終力壓「波子王」歐陽若曦等多名車手,贏得今季首個冠軍,一吐上個禮拜GP3奧地利站失威嘅烏氣之餘,仲為下禮拜嘅GP3英國站打咗支強心針。
港將方駿宇雖然早前喺GP3奧地利站失利,兩站過後喺八隊中暫列第五,但呢位90後車神好快收拾心情,周日夥拍日籍車手澤圭太代表賓利絕對車隊,以桿位出戰GT亞洲系列賽日本岡山站第四回合,以45分36秒363完成26個圈賽事,成功砌低Craft Bamboo車隊雙雄,包括另一名港將歐陽若曦,贏得今季首個冠軍。啱啱喺南韓站企凳仔嘅歐陽若曦,最後慢方駿宇2秒347,僅排第三。
年僅25歲嘅方駿宇,賽後受訪嗰陣表示:「好開心,其實應該上次喺南韓站已經可以攞好成績,但可能rhythm等等好多嘢未啱。今次有桿位之下帶到尾,仲幫澤圭太喺第一次贏車嘅地方贏車,亦都係賓利第一次喺亞洲地方贏車,車廠都有打嚟恭喜我哋。但呢個只係第一步,希望嚟緊攞多啲分,目標係全年總冠軍!」方駿宇今午返港稍作休息後,禮拜三就要飛往英國,備戰下月四、五號一連兩日喺享負盛名嘅銀石賽道舉行嘅GP3英國站。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載