› 選擇地區
三藩市
紐約
洛杉磯
其他美國地區
香港 台灣 北美
 
2015年07月07日

足動神經:
睇見智利想起昆士柏 - 波神

無冕美斯愧拒賽事最佳球員獎,但封王嘅智利,整體主攻戰實在出色,場場波嘅最佳球員都唔同,亦唔值得頒畀任何一人;不過見到神射手獎得主之一嘅伊度亞度華加斯(圖),同右閘伊斯拿呢兩位主隊主力,場場咁生猛,想起啱啱降咗班嘅英冠隊昆士柏流浪。
美洲國家盃盟主智利有三位主將來自上季嘅英超隊,阿歷斯山齊士去夏世界盃決賽周後以3,500萬鎊加盟阿仙奴,呢13個月期間,冇停過咁滯,踢咗67場正選,入29球及錄得14次助攻,個轉會價,馬後炮睇,真係抵到爛。據報「山神」話唔使兵工廠放佢一個月暑假,減半即返英國報到,準備八月初新球季;勸佢波士雲格勿太興奮,否則又重演上季季初急用、踢完世界盃決賽嘅奧斯爾,結果「大眼仔」季中捱唔住受重創,唞咗三個月。要爭聯賽冠軍,最緊要段力用得啱,唔係季尾失手,又會再賴傷兵多。
山神咁勁,祖記想放走嘅維達爾爆發力仲強,啱踢英超;不過已28歲而且性格帶點狂妄,阿仙奴本身有大量攻中人選,擸到門將施治後,要多個頂級防中更妙。喺美洲國家盃期間,當選過全場最佳嘅智利右閘伊斯拿同前鋒伊度亞度華加斯,上季就俾意甲祖雲達斯同拿玻里,分別借到倫敦蚊型英超會昆士柏流浪,際遇差得多。
球會季中換波士,呢對「落難孖寶」亦越踢越沉,上季季尾冇乜真正踢過護級戰,呢13個月嘅正選上陣次數,夾埋只比「山神」多踢一場。見到佢哋喺美洲盃出盡10成功力博賞識,有時有實力都要講際遇,話晒係冠軍隊成員,來季離開英超,有機會翻身。
昆士柏流浪已死,另一有翻身機會應該係入咗18個聯賽入球嘅土炮箭頭查理柯士甸。呢位踢法全面嘅硬漢下半季冇晒心機,好多場波笑住踢,似毫不在乎,入球量跌watt(最後10場聯賽僅入三球);般尼降班,暫時賣得最貴係三百多萬鎊嘅後衞捷比亞(丹尼艾格斯轉會費金額有待仲裁確認),侯城嘅湯馬士恩斯去打比郡值四百多萬鎊,但昆士柏暫時為柯士甸標價1,200萬鎊,紐卡素同般尼茅夫𥄫到實。
1,200萬鎊,買到個未見底嘅土炮國腳前鋒;3,000萬鎊爭個去年因腳踭受傷,唞過半年嘅同類型射手賓迪基,闊綽嘅利物浦,有冇得諗?文:波神

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載