› 選擇地區
三藩市
紐約
洛杉磯
其他美國地區
香港 台灣 北美
 
2015年07月21日

求驗客手記:
會長佩雷斯傳有癖好
皇馬反黑?

傳奇門將卡斯拿斯喺今夏黯然離開佢效力咗25年嘅皇家馬德里,好多球迷對佢所受嘅冷待感到不值,矛頭直指球會會長佩雷斯。卡斯拿斯嘅經理人山度士馬基斯都加入戰團插埋佩雷斯一份,仲爆佢原來對黑人球員有偏見,當年就係佢睇馬基列尼同伊度奧唔順眼逼走佢哋,而近年皇馬簽親嘅新兵都係青靚白淨。
除咗卡斯拿斯之外,當年馬基列尼同埋伊度奧嘅經理人亦都係山度士馬基斯。馬基斯講番往事,2003年皇馬將防守中場馬基列尼賣走,一年之後又唔肯回收伊度奧將佢賣畀巴塞隆拿,都係佩雷斯一手促成嘅惡果:「佩雷斯唔係種族主義者,不過佢就係唔鍾意黑人球員。」

唔鍾意黑人放走伊度奧

馬基列尼喺00年加盟皇馬,雖然從來冇人當佢係銀河艦隊幾條煙嘅其中一員,但作用就非常之大,喺中場搶波傳波。相比起施丹同魯爾等隊友,馬基列尼人工真係好奀,但佩雷斯就一口拒絕佢嘅加薪要求,令佢決定轉投車路士。至於伊度奧其實係皇馬青訓產品,04年本來有機會由馬略卡回購番佢一半擁有權,但佩雷斯睬都冇睬,結果咪睇住伊度奧過檔巴塞,贏咗三次西甲同兩次歐聯冠軍囉。馬基斯話:「當年我同佩雷斯爭論,誓神劈願話伊度奧嘅級數同星味唔差得過費高,但都係因為膚色而冇得返皇馬。」

唯美主義收購全靚仔

佩雷斯喺2000到06年第一次擔任皇馬會長,到09年返嚟再做,任期內一共簽咗39個球員,包括有施丹、碧咸、基斯坦奴朗拿度同加里夫巴利等等,事實上大部份都唔係黑人,對一啲有埋賣相嘅靚仔球星就更加情有獨鍾;冇嘢嘅,踢得之餘如果仲睇得,商業價值就一定更加大,冇賣相幾好波都係差啲,始終皇馬都係一家搵錢至上嘅球會。唔鍾意黑人呢種諗法真係唔要得,之前亦提過佩雷斯仲係唯美主義,陣中職球員都要以靚樣示人,所以要求新帥賓尼迪斯減吓肥,真係吹脹。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載