蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月09日
馬上成為壹會員

SUNDAY FEVER:
睇波男女大不同 - 馬啟仁

新球季殺到,有人好似見番久別重逢嘅愛人咁激動;與此同時,亦有人feel到情敵殺到咁,男女戰事一觸即發。
男生叫女友周末一齊睇波,因為唔使分心交人;而女生提出同男友一齊睇波,因為好耐冇見過佢咁專心,而據講專心嘅男人最迷人。
男生對球會忠誠,球員一轉隔籬隊波衫就係敵人;女生對球員專一,跟住偶像轉會一啲都唔內疚。
女生嘅另一半鍾意睇波,最大好處係生日好易買禮物畀佢;但最大嘅壞處係,自己生日都係收波衫做禮物。
睇波前男女都會做足準備,女嘅去759入貨,男嘅去投注站入錢。
女生鼓勵男生睇波,因為終於有問必答,而答案亦唔止得個「哦」字;男生最愛睇波時嘅女生,因為唔熟啲球員所以冇乜是非講,難得安靜。男生會因為一球世界波對球員另眼相看;女生會因為球員嘅髮型而改變立場。
男生可以忍受球員懶惰,唔可以接受球員無天份;女生可以忍受球員屎波,但唔可以接受球員出蠱惑。睇波期間男女一樣會post相上網,男嘅會影軒達臣怒鏟史達寧(圖)一幕,女嘅就會selfie自己咬唇瑟縮梳化一角。
男生愛wide shot睇戰術,女生愛close up睇大頭。男生對於講波佬好挑剔,彈兩句愛隊就係唔中立,睇死佢買咗好多;女生終於有啲嘢唔夠男生敏感,聽落個個講波佬把聲都係一樣樣,同講馬嘅好似係同一個人。
一場波終於睇完,女生熄電視瞓覺搵周公發好夢,男生熄電視開電腦搵link好輕鬆。

KEYMAN
節目主持

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載