› 選擇地區
三藩市
紐約
洛杉磯
其他美國地區
香港 台灣 北美
 
2015年08月21日

體壇拾趣:阿寶想極速再做爸爸

剛為人父嘅阿寶(左)獲委任為愛心大使,DJ車淑梅(右)都搞笑追問佢幾時擺酒。

剛榮升人父嘅前亞洲車神黃金寶,噚日以愛心大使身份現身鑽石山,出席「健障動歷」啟動禮,同場仲有「蜘蛛女」鄭麗莎客串教練,同舉重殘奧運動員林豔紅示範攀石。
自月初做咗爸爸之後首次公開露面,42歲嘅阿寶全程笑到四萬咁口,但原來B仔出世後,佢同老婆安琪(小圖左)都冇覺好瞓:「其實囝囝預產期係今(噚)日,可能佢細細個已經熱心公益,所以提早出世,等我可以出席呢項活動。啱啱先做咗爸爸媽媽,唔知點解BB夜晚就特別活躍,搞到我哋冇得瞓。」阿寶話唔會強求佢踩單車,只要佢健康就心足。

雖然連名都仲未改,但同太太註咗冊但未擺酒嘅阿寶,話咁快就心思思想追多個:「太太細我四年,都算係高齡產婦,如果身體情況許可都想趁早生多個。其實我哋一直諗住盡快生BB,點知阿囝搶閘出世,預產期撞埋婚期,之後補擺喜酒。」
單車隊部份成員正身處里約熱內盧出戰奧運測試賽,現任港隊教練嘅阿寶預計九月中就會歸隊,仲話已經預期會好掛住太太同BB喎!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載