› 選擇地區
三藩市
紐約
洛杉磯
其他美國地區
香港 台灣 北美
 
2015年09月08日

體壇拾趣:撐場變媾仔
寶查家姐 姣咀尼馬

Beatrice(右)同尼馬(左)相當親密,事後雙方更加喺社交網站高調傳情。互聯網

加拿大美少女寶查因撞傷咗個頭,正式緣盡今年美網所有賽事,外國傳媒將重點放晒喺佢同「壞孩子」基傑奧斯嘅緋聞度;而去咗美國捧佢場嘅孖生家姐Beatrice都不甘示弱,喺Instagram同巴西球星尼馬高調傳情,總之兩姊妹玩轉美網!

家姐傳情 寶查退出女單

Beatrice一有時間就會去捧寶查場,今次美網亦唔例外,更順道去埋睇喺紐約舉行嘅巴西對哥斯達黎加友賽。呢場波最後巴西以1:0小勝對手,尼馬只係喺後備上陣。不過,賽後Beatrice竟然成功進入球員通道,仲影咗張錫住尼馬塊面嘅相,睇見尼馬個樣都非常受落。事後佢哋就雙雙放張合照上Twitter,尼馬首先講:「好高興見到你,你為巴西帶嚟好運。」Beatrice稍後亦回應:「佢係最可愛!」不過寶查上周六因跌傷頭部而退出女雙同混雙比賽,周日佢就退出埋女單比賽。Beatrice咁得閒同尼馬傳情,唔使安慰退出美網嘅寶查咩?

其實,Beatrice之前已經喺睇美網時「野生捕捉」到1D嘅Niall Horan,今次就輪到尼馬,個個同佢合照都笑晒兼好親熱,靚女果然有着數。
講番美網,男單頭號種籽「一哥」祖高域,喺16強雖然失咗佢喺今屆賽事嘅第一盤,但最後有驚無險下都以6:3、4:6、6:4同6:3擊敗西班牙球手阿古,連續九年打入男單八強。賽後祖高域就話:「阿古值得贏第二盤波。呢場比賽打咗超過三個鐘,相當體力化,我好開心最後能夠贏出比賽。」祖高域八強嘅對手係另一名西班牙球手盧比斯,雖然對阿古消耗咗「一哥」唔少體力,但之前對賽祖高域就贏晒咁多場,相信優勢仲仲喺佢度。而上屆冠軍,克羅地亞嘅施歷就會對法國嘅泰桑高。

女單方面,輕鬆以直落兩盤淘汰同胞姬絲嘅「一姐」莎蓮娜會同姐姐威廉絲喺八強相遇。莎蓮娜賽前講到:「威廉絲係我最唔想對嘅對手,唔單止因為佢係我姐姐,而佢喺我心目中係最偉大球員。」對賽成績莎蓮娜就以15:11領先姐姐,睇吓威廉絲可唔可以威番次喇!(now676台今日7:15am直播)

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載