› 選擇地區
三藩市
紐約
洛杉磯
其他美國地區
香港 台灣 北美
 
2015年10月14日

求驗客手記︰炒立陶宛十戰全勝出線
英迷咪開心住

英格蘭冇咗朗尼一樣冇問題,喺禮拜一作客繼續贏,以3:0大勝立陶宛,歐國外10場贏晒出線,勁過晒德國、西班牙,十全十美;不過英格蘭總係希望越大,失望越大,球迷唔好咁快以為贏咗歐洲國家盃!
由於英軍已經出咗線,所以收起好多主力,隊長朗尼繼續唞,哈利卡尼就擔大旗。英軍開頭踢得幾順,29分鐘先由巴克里入一球,到35分鐘,就輪到卡尼發威,左腳窄位勁射破網,拉開到2:0。不過,卡尼真黑仔,慢鏡所見,原來呢球係射中柱,再彈中立陶宛門將入網,歐洲足協計咗做烏龍球。我求大俠諗,卡尼肯定無語問蒼天,點解今季想入球波都咁難!

黑仔卡尼入波變烏龍

卡尼今季表現唔錯,但聯賽成日入唔到波,到上個月對曼城先射入今季英超嘅開齋波,點知上輪對史雲斯又擺個烏龍。卡尼對立陶宛諗住數糊轉吓運啦,結果就變成人哋擺烏龍。換邊後,英格蘭靠張伯倫整多球,最終作客大勝3:0,歐國外10戰全勝,加埋入咗31球,只失三球。
英格蘭係今屆唯一全勝之師,德國同西班牙都做唔到,佢哋亦係史上第六支喺一屆歐國外全勝嘅球隊,之前有92年嘅法國、00年嘅捷克、04年嘅法國、12年嘅德國同西班牙。領隊鶴臣賽後好開心,「真係非凡嘅成就,我以球員嘅表現為榮,實在踢得太好,尤其係上半場。喺外圍賽,我哋擺咗好多心機踢,我好滿意10場贏晒呢個成績。」

朗尼休戰照打氣

朗尼就一邊睇直播,一邊為球隊打氣,完場後喺twitter留言:「10戰10勝,大家做得好!」雖然英軍喺外圍賽咁有霸氣,但英格蘭呢隊波總係希望越大,失望越大,近年喺大賽都冇畀過球迷驚喜,所以我求大俠建議英迷不宜開心得太早。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載