› 選擇地區
三藩市
紐約
洛杉磯
其他美國地區
香港 台灣 北美
 
2015年10月29日

咖喱牛腩:摩連奴之亂 - 咖喱

摩連奴(圖)可唔可以救番車路士?不如先問摩連奴救唔救到自己,佢最近都方寸大亂,做咗好多令自己置身喺風眼當中嘅事。當摩佬都又亂又躁,發晒爛渣,班球員又點可以沉着應戰呢?
季初網上有人講笑咁話,今季係英超19隊挽留羅渣士大行動,但大家都知行動已經失敗。最近就輪到19隊半挽留摩連奴,嗰半隊邊度嚟?摩佬話晒喺車仔有過豐功偉績,所以車迷內部都有一批人覺得,應該畀啲時間摩佬,睇吓佢做唔做到車仔嘅費格遜。不過,小弟覺得佢陣腳大亂,照咁睇只會越來越大鑊。
摩佬鬧球證唔係新聞,但鬧得咁密都係第一次,對修咸頓場波鬧完,俾英足總罰完冇幾日,就輪到喺歐聯鬧球證,話球證幼稚,擺明係想挑釁球證同足總。上場聯賽對韋斯咸,半場前已經有教練被趕上看台,但摩佬半場博拎紅牌,又走去挑釁球證,搞到自己都被罰埋上去。完場後,摩佬仲要唔開記者會,擺明係無聲抗議。花咁多心神同球證、足總搞對抗,對摩佬同成隊波都冇益。曼聯名宿加利尼維利早兩日都勸過摩佬,首先要避免呢啲負面新聞包圍球隊。
車仔𠵱家咁嘅成績,好多人即刻諗到更衣室出問題,但以英國傳媒嘅神通廣大都冇話車仔內訌,頂多係講吓夏薩特想去皇馬。小弟不期然諗起上季多蒙特,班球員係好撐高路普,但就係唔知點解成日輸,反而高路普宣佈季尾走人後,隊波就突然回勇。如果摩佬唔能夠冷靜落嚟、激發番球員嘅鬥志,不妨參考吓高路普上季嘅決定。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載